نئی دہلی:02جون2021 (فکروخبر/ذرائع) فائزر اور موڈرنا جیسی غیر ملکی ویکسینز کو جلد از جلد ہندوستان میں لانے کی سمت میں ایک اہم پیشرفت اس وقت ہوئی جب ہندوستان کی ادویات کے حوالہ سے اصول بنانے والے ادارے نے ایسی ویکسینز کے لئے ہندوستان میں الگ سے آزمائش کرانے کی شرط کو ہٹا دیا۔ اب ایسے ٹیکے جہیں دوسرے ممالک میں یا عالمی ادارہ صحت کی جانب سے ایمرجنسی طور پر استعمال کے لئے منظوری حاصل ہو چکی ہے، انہیں ہندودستان میں برِجنگ ٹرائلز سے نہیں گزرنا ہوگا۔

وزارت صحت کے ذرائع کے حوالہ سے این ڈی ٹی وی کی رپورٹ میں کہا گیا ہے کہ فائزر اور موڈرنا کو ’نقصان کی صورت میں معاوضہ‘ دینے میں ہمیں دقت نہیں ہے، اگر دوسرے ممالک نے ایسا کیا ہے تو ہم بھی کریں گے۔ ذرائع نے کہا کہ اگر ان کمپنیوں نے ایمرجنسی استعمال کے لئے درخواست پیش کی تو انہیں منظوری فراہم کر دی جائے گی۔ ذرائع نے کہا کہ چونکہ طلب بہت زیادہ ہے اس لئے حالت کے پیش نظر ان دونوں ویکسین کے ہندوستان آنے میں مزید وقت لگے گا۔

خیال رہے کہ فائزر اور موڈرنا ان غیر ملکی کمپنیوں میں شامل ہیں جنہوں نے حکومت سے ان کی ویکسین خراب ہو جانے کی صورت میں معاوضہ ادا کرنے کی شرط رکھی تھی۔ اگرچہ، حکومت نے تاحال کسی منفی اثر کے لئے نقصان کی تلافی کی ذمہ داری پر کوئی فیصلہ نہیں لیا ہے، تاہم خصوصی آزمائش نہ کرانے کا مطالبہ قبول کر لیا ہے۔

ڈرگ کنٹرولر جنرل آف انڈیا کے ایک مکتوب میں بتایا گیا ہے کہ غیرملکی کمپنیوں کے لئے لانچنگ کے بعد یہاں پر خصوصی آزمائش (برجنگ ٹرائلز) کی شرط کو ہٹا دیا گیا ہے۔ اب غیر ملکی ویکسین کو کسی دیگر ملک یا کسی صحت ادارے کی جانب سے منظوری حاصل ہے تو ہندوستان میں اس کی افادیت اور استحکام کے سلسلہ میں ٹیسٹنگ کرائے جانے کی ضرورت نہیں ہوگی۔