بنگلورو27؍مارچ 2024: کرناٹک کے وزیر صحت دنیش گنڈو راؤ نے منگل کو عوام کو مشورہ دیا کہ وہ ریاست میں بڑھتے ہوئے درجہ حرارت سے خود کو بچانے کے لیے اقدامات کریں۔ کرناٹک کے وزیر صحت نے یہ بھی بتایا کہ محکمہ صحت کے کمشنر نے بھی ہدایات جاری کی ہیں۔

ضلع ہیلتھ افسران کو ہدایت دی ہے کہ وہ اس بات کو یقینی بنائیں کہ تمام اسپتالوں میں گرمی سے متعلق مختلف مسائل کی صورت میں مناسب علاج کے لیے ادویات آسانی سے دستیاب ہوں۔

اپنے سوشل میڈیا ہینڈل پرکرناٹک کے وزیر صحت نے X پر پوسٹ کیا کہ ریاست میں موسم گرما کی گرمی دن بہ دن شدت اختیار کرتی جا رہی ہے، اور لوگ حد سے زیادہ گرمی سے نمٹنے کے لیے جدوجہد کر رہے ہیں۔ گزشتہ ایک ماہ سے زیادہ سے زیادہ درجہ حرارت 40 ڈگری کے آس پاس ہے۔ گرمی سے متعلق مختلف مسائل جیسے سن اسٹروک، مائگرین اور جلد کے مسائل کی وجہ سے لوگ اسپتالوں کا رخ کرتے ہیں۔

اس کے علاوہ، بیکٹیریل اور وائرل انفیکشن میں نمایاں اضافہ ہوا ہے۔ کیسز کی بڑھتی ہوئی تعداد کے جواب میں محکمہ صحت کے کمشنر نے ضلعی صحت کے افسران کو اس بات کو یقینی بنانے کی ہدایت کی ہے کہ تمام ہسپتالوں میں جان بچانے والی ادویات مناسب علاج کے لیے آسانی سے دستیاب ہوں۔