سونورا 22؍ جولائی 2023 : میکسیکو کی ریاست سونورا میں ریت کے طوفان نے تباہی مچا دی، تیز ہواؤں کے چلنے سے درخت اکھڑ گئے اور بجلی کے تاروں میں آگ بھڑک اٹھی۔

غیر ملکی میڈیا رپورٹس کے مطابق 20 جولائی کی شام کو میکسیکو کے علاقے سونورا میں اس وقت شہر کی فضا سرخ ہو گئی اور ہر شے گرد آلود ہو گئی، جب ایک دل دہلا دینے والے ریت کے طوفان نے اسے گھیر لیا۔

سامنے آنے والی ویڈیوز میں دیکھا جا سکتا ہے کہ ریت کا طوفان کتنا ہولناک تھا، تیز ہواؤں سے درخت اکھڑ گئے، بجلی کے تاروں میں آگ لگنے سے بجلی کا نظام درہم برہم ہو گیا، جب کہ گرد و غبار کے طوفان سے ٹرانسپورٹ کا نظام درہم برہم ہوا۔

سونورا میں طوفان کے بعد متعدد ہائی ویز کو بند کر دیا گیا، لوگوں کی نقل و حرکت رک گئی، ریت کا یہ طوفان سونورا کے دو شہروں گائماس اور ایمپلمے میں آیا، جس کی وجہ سے تقریباً 80 فی صد آبادی کی بجلی فراہمی کو متاثر کیا۔ طوفان نے ہائی وولٹیج کے کھمبوں، پبلک لائٹنگ کے کھمبوں اور ٹیلی فون کے کھمبوں کو بھی خاصا نقصان پہنچایا۔