کویت آنے کیلئے چال چلن کی سند لازمی قرار

کویت سٹی:17دسمبر2019(فکروخبر/ذرائع) حکام نے کویت آنے والے غیر ملکیوں کے لیے نئی شرط رکھ دی، ملک میں داخل ہونا ہے تو چال چلن کی سند(کریکٹر سرٹیفکیٹ) لازمی ہونی چاہیئے۔

تفصیلات کے مطابق کویت حکام نے پہلی بار اقامہ ویزے پر آنے غیرملکیوں کے لیے نیا قانون نافذ کردیا، اب غیر ملکیوں کے کریکٹر کا جائزہ لیا جائے گا، کسی بھی قسم کے جرائم میں ملوث افراد کویت کا ویزا حاصل کرنے سے محروم رہیں گے۔

غیر ملکی خبررساں ادارے کے مطابق کویت آنے کے خواہش مند افراد اپنے ہی ملک سے کریکٹر کا سرٹیفکیٹ حاصل کرسکتے ہیں جبکہ ملک میں داخل ہونے کے بعد کویت کے متعلقہ اداروں سے بھی اعلیٰ اخلاق کی سند حاصل کرنا ہوگی۔

کویت وزارت داخلہ کا کہنا ہے کہ دنیا بھر میں تمام کویت سفارت خانوں اور قونصلیٹ کو مذکورہ قوانین کی تفصیلات فراہم کردی گئی ہیں جس میں پہلی بار اقامہ ویزے پر آنے والے غیر ملکیوں کے لیے چال چلن کی سند اپنے ہمرا رکھنا لازمی قرار دیا گیا ہے۔

کویت آنے والے امیدواروں کی سند کویتی سفارتخانے یا قونصلیٹ سے تصدیق کروائی جائے۔ چال چلن کا سرٹیفکیٹ 3 ماہ سے زیادہ پرانا نہ ہو، ورنہ قابل قبول تصور نہیں کیا جائے گا۔

خیال رہے کہ کویت میں کریکٹر سرٹیفکیٹ حاصل کرنے کے لیے مخصوص پولیس اسٹیشن سے رابطہ کیا جاتا ہے جس کے بعد امیدوار کی فنگر پرنٹ لی جاتی ہے اور باریک بینی سے جائزہ لیا جاتا ہے کہ مذکورہ شخص کسی قسم کے جرائم میں ملوث تو نہیں ہے، بعد ازاں سرٹیفکیٹ کا اجرا ہوتا ہے۔