اپنی آزادنہ حیثیت اور اعتبار پر سمجھوتا نہیں کرتے، عالمی جوہری ادارہ 

عالمی ادارہ ضرورت پڑنے پر اپنے معائنہ کار مخصوص علاقوں اور تنصیبات پر بھیجتا ہے،سربراہ کا بیان 

نیویارک:03؍اکتوبر2018(فکروخبر/ذرائع)بین الاقوامی جوہری توانائی ایجنسی آئی اے ای اے نے کہا ہے کہ وہ اپنی آزادنہ حیثیت اور اعتبار پر کوئی سمجھوتا نہیں کرتی۔غیرملکی خبررساں ادارے کے مطابق اسرائیلی وزیراعظم بینجمن نیتن یاہو کی جانب سے ایران پر عائد کیے جانے والے نئے الزامات کے تناظر میں اس عالمی ادارے نے کہا کہ خفیہ معلومات چہرے دیکھ کر حاصل نہیں کی جاتی۔ آئی اے ای اے کے سربراہ یوکیا امانو کی جانب سے جاری کردہ بیان میں مزید کہا گیا کہ یہ عالمی ادارہ ضرورت پڑنے پر اپنے معائنہ کار مخصوص علاقوں اور تنصیبات پر بھیجتا ہے اور دستیاب معلومات کا تحفظ کیا جاتا ہے۔ نیتن یاہو نے اقوام متحدہ کی جنرل اسمبلی سے خطاب میں الزام عائد کیا تھا کہ ایران دنیا کی نگاہوں سے چھپ کر جوہری ہتھیاروں کی تیاری میں مصروف ہے۔