برمنگھم کی مسجد کے باہر کار نے لوگوں کو روند ڈالا، 2 زخمی،ہسپتال منتقل 

واقعے میں دہشت گردی خارج از امکان نہیں،تمام پہلوؤں سے تفتیش جاری ہے ،پولیس حکام 

لندن:28؍اپریل2018(فکروخبر/ذرائع) برطانیہ کے شہر برمنگھم کی شاہ جلال مسجد کے باہر ایک کار سوار نے لوگوں کو روند ڈالا، جس کے نتیجے میں 2 افراد زخمی ہوگئے۔خبر رساں ادارے اے ایف پی کے مطابق دونوں زخمیوں کی عمریں 20 برس کے قریب ہیں اور ان میں سے ایک کے سر میں چوٹ آئی ہے۔پولیس کا کہنا ہے کہ واقعے میں دہشت گردی خارج از امکان نہیں، تاہم تمام پہلوؤں سے تفتیش کی جارہی ہے۔دوسری جانب مسلمان رکن پارلیمنٹ شبانہ محمود کا کہنا ہے کہ اس واقعے سے کمیونٹی میں تشویش کی لہر دوڑ گئی ہے۔گذشتہ کچھ عرصے کے دوران یورپ سمیت دیگر ممالک میں اس طرح کے واقعات میں اضافہ ہو گیا ہے۔رواں ماہ 24 اپریل کو کینیڈا کے شہر ٹورنٹو میں بھی ایک شخص نے وین فٹ پاتھ پر چڑھا کر راہگیروں کو روند ڈالا تھا، جس کے نتیجے میں 10 افراد ہلاک اور 15 زخمی ہوگئے تھے۔