بنگلورو 28؍فروری 2024(فکروخبرنیوز) کرناٹک میں راجیہ سبھا کے انتخابی نتائج کے بعد، ایک گمراہ کن بیانیہ سامنے آیا جب کئی نیوز چینلوں نے یہ اطلاع دی کہ کانگریس امیدوار نصیر حسین کے حامیوں نے جشن کے دوران "پاکستان زندہ باد" کے نعرے لگائے۔ تاہم ویڈیو فوٹیج کے قریب سے جائزہ لینے سے معلوم ہوا کہ حامی دراصل "نصیر صاب زندہ باد" کے نعرے لگا رہے تھے۔

مشہور کنڑ نیوز آؤٹ لیٹس، بشمول TV9، Suvarna News، Public TV، Vistara News، News First، اور Republic Kannada نے اس جھوٹے دعوے کا پرچار کیا کہ نعرے پاکستان کی حمایت میں تھے۔

کچھ رپورٹس کے مطابق نصیر حسین کے ساتھ کھڑا ایک شخص "پاکستان زندہ باد" کا نعرہ لگا رہا تھا۔ تاہم، ایک اور ویڈیو میں دکھایا گیا کہ وہ شخص درحقیقت "نصیر صاب زندہ باد" کا نعرہ لگا رہا تھا۔

کئی نیوز چینلوں نے گمراہ کن معلومات کو نشر کیا، جس کی وجہ سے بی جے پی لیڈروں نے ودھان سودھا پولیس اسٹیشن میں شکایت درج کرانے کا ارادہ ظاہر کیا۔

آلٹ نیوز کے شریک بانی محمد زبیر نے بھی اپنے ایکس اکاؤنٹ پر سلو موشن میں ویڈیو شیئر کی، جس میں لوگوں کو 'ناصر صاب زندہ باد' کے نعرے لگاتے ہوئے دیکھا جا سکتا ہے۔

وارتا بھارتی کے شکریہ کے ساتھ