کانگریس کے سینئر لیڈر جے رام رمیش نے کہا کہ کانگریس اب بھی یہ سمجھتی ہے کہ مغربی بنگال کی وزیر اعلیٰ ممتا بنرجی انڈیا اتحاد کا حصہ ہیں اوروہ ایک ساتھ لوک سبھا انتخابات میں بی جے پی کو شکست سے دودچار کر سکتے ہیں۔واضح رہے کہ جے رام رمیش کا یہ بیان اس وقت سامنے آیا ہے جب ممتا بنرجی نے اس حوالے سے شبہ ظاہر کیا تھا کہ کیا کانگریس لوک سبھا انتخابات میں ۴۰؍ سیٹیں بھی حاصل کر پائے گی۔ رمیش، نے راہل گاندھی کی بھارت جوڑو نیائے یاترا کے دوران کہا کہ ہم اب بھی یہ سمجھتے ہیں کہ ممتا بنرجی انڈیا اتحاد کا حصہ ہیں۔ ان کی اولین ترجیح بھی بی جے پی کو لوک سبھا انتخابات میں شکست دینا ہے اورہماری بھی۔ بہتر یہ ہے کہ ہم بی جے پی کو ہرانے کیلئے ایک ساتھ لڑیں۔ 

ہم بنگلور، پٹنہ اور ممبئی میں ایک ساتھ تھےلیکن درمیان میں کچھ معاملات درپیش آگئے۔ پہلے شیوسینا ٹوٹ گئی ۔ اس کے بعد نتیش کمار نے ’’پلٹی ‘‘ ماری ۔ اب ممتا بنرجی اس طرح کے ردعمل کا اظہار کر رہی ہیں۔ مجھے لگتا ہے کہ ہمیں یہ سمجھنے کی ضرورت ہے کہ یہ مقامی سطح کے انتخابات نہیں ہیں۔ خیال رہے کہ ممتا بنرجی نے کولکاتا میں دھرنے کے درمیان خطاب کرتے ہوئے کہا تھا کہ میری یہ تجویز پیش کی کہ کانگریس ۳۰۰؍ سیٹوں پر مقابلہ کرے لیکن انہوں نے میری تجویز کو اہمیت نہیں دی۔ اب مجھے شبہ ہے کہ وہ ۳۰۰؍ سیٹوں پر الیکشن لڑتے ہیںتو وہ ۴۰؍ سیٹیں بھی حاصل کر پائیں گے یا نہیں۔خیال رہے کہ ممتا بنرجی نے بی جے پی مرکزی حکومت کو الٹی میٹم جاری کیا تھا کہ اگر انہوں نے یکم فروری تک مغربی بنگال کے فنڈز پاس نہیں کئےتو وہ دھرنے پر بیٹھ جائیں گی۔ قبل ازیں ممتا بنرجی نے اعلان کیا تھا کہ وہ مغربی بنگال میں تنہا لوک سبھا انتخابات لڑیں گی اور ٹی ایم سی ریاست میں بی جےپی کو شکست دینے کیلئے کافی ہے۔