مرکزی وزیر داخلہ امت شاہ کی موجودگی میں بھارتیہ جنتا پارٹی (بی جے پی) کے بھوپال اور نرمداپورم ڈویژن کے پارٹی عہدیداروں کی میٹنگ مدھیہ پردیش سطح کے لیڈروں کی موجودگی میں رات دیر گئے تک جاری رہی اور اس دوران اسمبلی انتخابات میں پارٹی کی جیت سے متعلق مختلف پہلوؤں پر تفصیلی تبادلہ خیال کیا گیا۔

پارٹی ذرائع کے مطابق اپنے تین روزہ دورے کے پہلے دن مسٹر شاہ جبل پور اور چھندواڑہ کے راستے ہفتہ کی دیر رات بھوپال پہنچے۔ وہ سیدھے ریاستی پارٹی ہیڈکوارٹر پہنچے، جہاں انہوں نے بھوپال اور نرمداپورم ڈویژن کے لیڈروں اور کارکنوں کے ساتھ میٹنگ کی۔ مسٹرشاہ نے ان دو ڈویژنوں میں پڑنے والی 36 اسمبلی سیٹوں کے بارے میں تفصیلی رائے لی۔ انہوں نے پارٹی کے مبینہ باغیوں سے بھی بات چیت کی اور انہیں غور سے سننے کے بعد پارٹی کے مفاد میں کام کرنے کا مشورہ دیا۔

رات کے آرام کے بعد مسٹر شاہ نے صبح پارٹی لیڈروں کے ساتھ اسمبلی انتخابات سے متعلق مسائل پر بھی تبادلہ خیال کیا۔ ذرائع نے بتایا کہ مسٹر شاہ اپنے تین روزہ دورے کے آخری دن پیر 30 اکتوبر کو اندور میں اندور ڈویژن کی ڈویژنل میٹنگ سے خطاب کریں گے۔ اس کے بعد وہ گوالیار پہنچیں گے اور گوالیار اور چمبل ڈویژن کی ڈویژنل میٹنگ میں رہنمائی کریں گے۔

اسمبلی انتخابات کے لیے ووٹنگ 17 نومبر کو ہے اور پرچہ نامزدگی داخل کرنے کا کام پیر یعنی 30 اکتوبر کو مکمل ہو جائے گا۔ بی جے پی مدھیہ پردیش میں اپنے اقتدار کو برقرار رکھنے کی پوری کوشش کر رہی ہے اور مرکزی قیادت نے انتخابی مہم کی کمان اپنے ہاتھ میں لے لی ہے۔