ماسکو: 20مئی2021 (فکروخبر/ذرائع)روس میں کرونا وائرس کا مکمل خاتمہ ہونے کا امکان روشن ہو گیا ہے، عالمی ادارہ صحت نے بھی تصدیق کر دی۔

تفصیلات کے مطابق ورلڈ ہیلتھ آرگنائزیشن (ڈبلیو ایچ او) نے ماسکو میں کرونا وائرس کیسز میں موجودہ کمی کا نوٹس لیتے ہوئے کہا ہے کہ امید ہے یہ رجحان برقرار رہے گا، اور روس میں کرونا وائرس دوبارہ سر نہیں اٹھائے گا۔

روس میں ڈبلیو ایچ او کی نمائندہ میلیٹا ووزنوچ نے سرکاری ریڈیو کو انٹرویو میں کہا میں دیکھ سکتی ہوں کہ ماسکو میں چار دن سے کرونا کیسز کی تعداد مسلسل گرتی جا رہی ہے اور ہم امید کرتے ہیں کہ یہ سلسلہ اسی طرح جاری رہے گا۔

میلیٹا نے روس میں آئندہ تیسری کرونا وائرس لہر کے امکان کے بارے میں کہا کہ کیسز کی تعداد میں اتار چڑھاؤ پر گہری نظر رکھنے کی ضرورت ہے، ہم نہ صرف یورپ بلکہ پوری دنیا میں کرونا کیسز میں اتار چڑھاؤ دیکھ سکتے ہیں۔

انھوں نے کہا میں روس کے نگران ادارے سے اتفاق کرتی ہوں کہ کرونا وائرس کی لہروں کے بارے میں بات کرنے کی کوئی وجہ نہیں ہے تاہم جب کیسز کی تعداد میں اضافہ ہونا شروع ہوتا ہے تو اس پر نظر رکھنا ضروری ہے، وبا کو ڈیڑھ سال ہو چکا، اب ہم جانتے ہیں کہ کیسز کو بڑھنے سے کیسے روکا جائے۔

یاد رہے روس کی نگران ایجنسی نے کہا تھا کہ روس میں کرونا وائرس کا خاتمہ رواں سال موسم خزاں تک ہو سکتا ہے جس کی تصدیق بعد ازاں روسی صدر کے ترجمان دمتری پیسوکوف نے بھی کی، انھوں نے کہا رواں سال کے اخر تک کرونا وائرس کے خلاف مطلوبہ ہرڈ ایمونیٹی حاصل ہو جائے گی اور ملک کرونا بحران سے نکل آئے گا۔

روس میں عالمی ادارہ صحت کی نمائندہ نے کہا کہ روس میں جاری مسلسل کرونا کیسز کی کم تعداد اور ویکسینیشن سے روس میں موسم خزاں تک صورت حال بہت بہتر ہو سکتی ہے کیوں کہ روسی آبادی کی ایک بڑی تعداد کرونا وائرس کے خلاف ہرڈ ایمونیٹی حاصل کر لے گی۔