القدس کو اسرائیلی دارالحکومت تسلیم کرنے والے ممالک فیصلہ واپس لیں

قاہرہ :04ستمبر2019(فکروخبر/ذرائع)عرب پارلیمان نے جمہوریہ ہنڈوراس اور 'ناورو' سمیت دوسرے ممالک کی طرف سے القدس کوتسلیم کرنے کی شدید مذمت کرتے ہوئے ان ممالک پر اپنے فیصلے تبدیل کرنےپرزور دیا ہے۔

مرکزاطلاعات فلسطین کے مطابق قاہرہ میں قائم عرب پارلیمان کے صدر دفتر سے جمہوریہ ہنڈوراس اور ناورو کو مکتوبات ارسال کیے ہیں جن میں ان سے کہا گیا ہے کہ وہ القدس کو اسرائیل کا دارالحکومت تسلیم کرنے کا فیصلہ واپس لیں۔

مکتوبات میں کہا گیا ہے کہ عرب پارلیمنٹ کو اسرائیل کا دارالحکومت قرار دینا قضیہ فلسطین کے دو ریاستی حل کی راہ میں ایک بڑی رکاوٹ ہے اور اس سے القدس میں صہیونی ریاست کے غیرقانونی غلبے کو وسعت دینے میں مدد ملے گی۔

ان کا کہنا ہے کہ القدس کو اسرائیل کا دارالحکومت تسلیم کرنا غیرذمہ دارانہ، عالمی قوانین، اقوام متحدہ کی قراردادوں اورعرب اقوام اور فلسطینیوں کی دیرینہ خواہشات کی توہین ہے۔

خیال رہے کہ 21 دسمبر 2017ء کو اقوام متحدہ کی جنرل اسمبلی نے القدس کو مقبوضہ علاقہ قرار دیتے ہوئے تمام ممال پر زور دیا تھا کہ وہ القدس کے تاریخی اسٹیٹس کا احترام کریں۔