بریلی کے بازار میں دس روپئے کی خاطر شخص نے دوست کو اتارا موت کے گھاٹ

بریلی:13؍اکتوبر2018(فکروخبر/ذرائع)اترپردیش میں بریلی کے بھوتا علاقے میں بال کاٹنے پرمحض دس روپے کے لیے ہوئے جھگڑے میں ایک سیلون مالک نے اپنے پرانے دوست کوقینچی سے حملہ کرکے قتل کردیا۔پولیس سپرنٹنڈنٹ (دیہات) ڈاکٹر ستیش کمار نے بتایا کہ رنپورا پروین کے بہادرپور گاؤں کے رہنے والے پریم پال 
   

 گنگوار (42) کی دوستی 20سال سے گاؤں کے تراہے پر ہی کھوکا لگا کر سیلون چلانے والے اہبرن لال سے تھی۔ مقامی لوگوں کے مطابق، دونوں اکثر شام کو ساتھ بیٹھ کر نشہ کرتے تھے۔ جمعہ کو گاؤں میں بازار لگاتھا۔ شام کو تقریباً پانچ بجے پریم پال اہبرن کے کھوکے پر پہنچا۔ بال کٹوانے کے لیے دس روپے لے کر دونوں کے درمیان نوک جھونک ہونے لگی۔ اسی دوران پریم پال نے اہبرن کو تھپڑ مار دیا۔ بھرے بازار میں تھپڑ لگنے سےاس نے غصہ میں آکر بال کاٹنے والی قینچی پریم پال کے سینے میں ماردی۔

انہوں نے بتایا کہ دونوں کے درمیان جھگڑے کی خبر پر ان کے رشتہ دار موقع پر پہنچے۔ پریم پال کو بچانے اس کے بیٹے لکھن اور ویپن پہنچے۔ اہبرن نے لاٹھی سے دونوں بچوں کو بھی پیٹا اور خون سے سنی قینچی چھوڑ کر موقع سے فرار ہوگیا۔ پولیس نے زخمیوں کو اسپتال میں داخل کرایا ہے جہاں ڈاکٹروں نے پریم پال کو مردہ قرار دے دیا۔ پولیس معاملے کی تفتیش کررہی ہے۔