گجرات ریپ معاملہ : کام سے لوٹ رہے ایک مزدور کی لوگوں نے پیٹ پیٹ کر لی جان ،دہشت کے سایہ میں شمالی ہندوستان کے مزدور

سورت:13؍اکتوبر2018(فکروخبر/ذرائع)گجرات میں شمالی ہندوستان کے غریب مزدوروں کے خلاف گجراتیوں کی نفرت لگاتار بڑھ رہی ہے۔ تازہ معاملہ میں بہار کے گیا ضلع کے رہائشی ایک شخص کا جمعہ کی شام لوہے کی راڈ سے پیٹ پیٹ کر قتل کر دیا گیا۔ امرجیت نامی یہ شخص سورت میں 15 سالوں سے رہ رہا تھا۔ وہ پنڈیشورا علاقہ میں واقع ایک مل میں کام کرتا تھا اور وہاں کے مزدوروں کے لئے سامان بھی پہنچاتا تھا۔ جمعہ کی شام جب وہ مل سے واپس لوٹ رہا تھا تو مشتعل ہجوم نے اس کا قتل کر دیا۔

نیوز 18 ہندی کے مطابق، ضلع گیا میں کونچ تھانہ کے کوڑیا گاؤں کا رہائشی امرجیت 15 سال قبل روزگار کی تلاش میں گجرات گیا تھا۔ اس نے محنت کے بل پر وہاں اپنا گھر بنا لیا اور شادی بھی کر لی تھی، امرجیت کے دو بچے بھی ہیں، واقعہ کے بعد سے خاندان کے افراد کا رو رو کر برا حال ہے۔

امرجیت کے والد راجدیو سنگھ ریٹائرڈ فوجی ہیں۔ انہوں نے بتایا کہ ان کا بیٹا کافی محنتی تھا، اس کی مدد سے خاندان خوشحالی میں زندگی گزار رہا تھا، قتل کے بعد پورا خاندان صدمہ میں ہے۔

امرجیت کے والد نے حکومت بہار کے ساتھ گجرات اور مرکزی حکومت سے اس تشدد کو روکنے کے لئے ضروری قدم اٹھانے کی اپیل کی ہے تاکہ کسی دوسرے خاندان کو اس درد سے نہ گزرنا پڑے۔

سورت کے پولس کمشنر ستیش شرما نے نیوز 18 گجراتی کو بتایا کہ یہ موب لنچنگ (ہجومی تشدد) کا واقعہ نہیں ہے، امرجیت کی موت ایک سڑک حادثہ میں ہوئی ہے۔