حوثیوں کو سپلائی کی جانے والی ایک ٹن سے زائد حشیش تلف

ضبط کی گئی حشیش صنعاء اور صعدہ شہروں کو لے جانے کی کوشش کی جا رہی تھی،ذرائع 

صنعاء:02؍اکتوبر2018(فکروخبر/ذرائع)یمن کے سیکیورٹی اداروں نے الجوف گورنری میں حشیش نامی منشیات کی بھاری مقدار قبضے میں لینے کے بعد اسے نذرآتش کردیا۔ یہ منشیات حالیہ عرصے کے دوران قبضے میں لی گئی تھی۔ اسے یمن میں ایران نواز حوثی باغیوں کے زیرتسلط علاقوں میں لے جانے کی کوشش کی جا رہی تھی۔غیرملکی خبررساں ادارے الجوف گورنری کے ڈائریکٹر جنرل پولیس بریگیڈیئر سلیم السیاغی نے بتایا کہ سیکیورٹی اداروں نے گورنری سے 1050 کلو گرام حشیش (بھنگ) ضبط کی تھی جسے عدالتی حکم پر تلف کردیا گیا۔ذرائع کا کہنا تھا کہ ضبط کی گئی حشیش صنعاء اور صعدہ شہروں کو لے جانے کی کوشش کی جا رہی تھی۔ ذرائع کے مطابق حوثی باغیوں کی طرف سے بھنگ لے جانے کی کوشش کا مقصد شہریوں کو منشیات فروخت کرکے اکٹھا ہونے والا پیسہ حکومت مخالف جنگ میں استعمال کرنا تھا۔