بھٹکل میں چوری کی وارداتیں عوام کے لیے باعثِ تشویش

چوری کی وارداتوں میں ایک بات عام طور پر دیکھی جارہی ہے کہ چور ہمیشہ بند گھروں کو ہی نشانہ بنارہے ہیں جس سے عوام کو شبہ ہے کہ شہر میں ایک چوروں کی ایک ٹولی سرگرم ہے جو ہمیشہ بند گھروں پر نظر رکھے ہوئے ہیں اور موقع ملتے ہی واردات انجام دیتے ہیں۔ اس سے قبل شہر کے پرانے علاقہ ، قاضیا اسٹریٹ ، تکیہ اسٹریٹ میں چوری کی کئی ایک وارداتیں منظر عام پر آچکی ہیں لیکن اب نوائط کالونی ، کارگیدے، جامعہ آباد روڈ پر بھی وارداتیں انجام دئیے جانے کی خبریں موصول ہوئیں ہیں۔ چور اتنے ماہر سمجھے جارہے ہیں کہ کئی گھروں میں چوری کی واردات اتنی تیزی کے ساتھ انجام دیتے ہیں کہ اگر مکین بازار سے سودا سلف لانے بھی چلا جائے تو تب تک چورقیمتی اشیاء پر ہاتھ صاف کرچکے ہوتے ہیں۔ چوری کی واردات کی خبر منظر عام پر آتے ہی پولیس متعلقہ مکان پر پہنچ جاتی ہیں اور جانکاری حاصل کرنے کے بعد تحقیقات کیے جانے کی یقین دہانی کرتی ہے لیکن ہمیشہ کی طرح چور پولیس کی گرفت سے دور ہوتے ہیں ۔ بڑھتی چوری کی یہ وارداتیں اب شہرکے پولیس اہلکاروں کے لیے ایک چیلنج بنی ہوئی ہیں۔ کئی مرتبہ پولیس نے کئی ایک محلوں میں پہنچ گھروں میں سی سی ٹی وی کیمرے لگانے کی بھی گذارش کی ہے۔ اب عوام کا سوال یہ ہے کہ ان وارداتوں کو انجام دینے والوں کی ٹولی کو کیا بھٹکل پولیس گرفتار کرپائی گی ؟؟