23/اپریل/2024(فکروخبر/ذرائع)چین کے جنوبی علاقوں میں تیزہواؤں کے ساتھ موسلادھار بارشوں سے نظام زندگی درہم برہم ہو گیا جبکہ چھ افراد کے زخمی ہونے کی اطلاعات ہیں۔

بین الاقوامی خبر رساں ادارے کی رپورٹ کے مطابق موسلا دھار بارشوں کے باعث ٹریفک اور ٹرینوں کا نظام درہم برہم ہوگیا ہے جبکہ مختلف حادثات میں کئی افراد زخمی ہوگئے، تیز ہواؤں سے متعدد گھروں کی چھتیں بھی اڑ گئیں۔

صوبے گوانگ ڈونگ کے کئی علاقوں میں مسلسل بارشوں کے باعث ہنگامی صورت حال پیدا ہوگئی اور چین کے گوانگ ڈونگ میں سڑکوں، رہائشی علاقوں اور کھیتوں میں کئی فٹ پانی کھڑا ہوگیا ہے۔

مسلسل بارشوں کے باعث جیانگ ژی صوبے میں بھی شدید خراب موسم کا اورنج الرٹ جاری کردیا گیا ہے، گوانگ ژی میں مسلسل بارشوں کے بعد مٹی کے تودے گرنے کے 65 واقعات رپورٹ ہوچکے ہیں۔

چینی میڈیا کا اس حوالے سے کہنا ہے کہ پانی میں پھنسے 80 ہزار سے زائد افراد کو نکال لیا گیا ہے جبکہ شدید بارشوں کے بعد 10 لاکھ سے زائد افراد بجلی سے محروم ہوگئے ہیں اور سینکڑوں اسکولوں کو بند کردیا گیا ہے۔

سیلاب سے لاکھوں افراد کے بے گھر ہونے کے خدشے پر حکام نے ایمرجنسی ایڈوائزری بھی جاری کردی ہے، ڈیموں اور دریاؤں میں پانی کی سطح بڑھنے سے بھی سیلاب کا خطرہ پیدا ہوگیا ہے۔