مہاتما گاندھی کی برسی پر کانگریس نے ان کے لیے بہترین خراج عقیدت نفرت کے خلاف جنگ لڑنے کو قرار دیا ہے۔ کاگنریس کا کہنا ہے کہ راشٹرپتا کو سچی خراج عقیدت یہی ہوگی کہ نفرت کی آندھی میں سچائی اور خیر سگالی کی شمع کو بجھنے نہ دیا جائے۔ پارٹی کا یہ بھی کہنا ہے کہ جو لوگ مہاتما گاندھی کے قاتل ناتھو رام گوڈسے کی تعریف کرتے ہیں، انھیں ہندوستان کے نظریات کو متعارف کرنے کی اجازت قطعی نہیں دی جانی چاہیے۔

کانگریس کے سابق صدر اور بھارت جوڑو نیائے یاترا کی قیادت کر رہے گاہل گاندھی نے مہاتما گاندھی کی موت کا سبب آر ایس ایس کے نظریات کو ٹھہرایا ہے۔ انھوں نے اپنے ایک سوشل میڈیا پوسٹ میں لکھا ہے کہ ’’آج ہی کے دن نفرت اور تشدد کے نظریات نے ملک سے ان کے باپو کو چھینا تھا۔ اور آج وہی سوچ ان کے اصولوں و نظریات کو بھی ہم سے چھین لینا چاہتی ہے۔ لیکن نفرت کی اس آندھی میں سچائی اور خیر سگالی کی شمع کو بجھنے نہیں دینا ہے۔ یہی گاندھی جی کو ہماری سچی خراج عقیدت ہوگی۔‘‘

کانگریس صدر ملکارجن کھڑگے نے بھی ایک سوشل میڈیا پوسٹ کے ذریعہ مہاتما گاندھی کو یاد کیا ہے۔ انھوں نے مہاتما گاندھی کے ایک نظریہ کا حوالہ دیتے ہوئے کہا ہے کہ ہمارا دشمن ڈر ہے۔ ہمیں لگتا ہے کہ یہ نفرت ہے، لیکن دراصل یہ ڈر ہے۔ کھڑگے مزید لکھتے ہیں کہ ’’شہید دیوس پر اپنے ملک کے اخلاقی محافظ باپو کو اپنا احترام پیش کرتا ہوں۔ ہمیں ان لوگوں کے خلاف لڑنے کا عزم کرنا چاہیے جو ’ممکن‘ اور ’طلوع‘ (سبھی کی ترقی) پر مبنی ان کے اصولوں کو تباہ کرنا چاہتے ہیں۔‘‘ کھڑگے نے کہا کہ تنوع میں اتحاد والے ہندوستان کی حفاظت کے لیے سب کچھ کرنا ہوگا اور لوگوں کے درمیان انصاف، مساوات اور بھائی چارہ بھی یقینی کرنا ہوگا۔

قابل ذکر ہے کہ 76 سال قبل آج ہی کے دن، یعنی 30 جنوری کو مہاتما گاندھی کا قتل ناتھو رام گوڈسے نے کر دیا تھا۔ گاندھی جی کی یاد میں آج بہار کے ارریہ میں بھارت جوڑو نیائے یاترا کیمپ والی جگہ پر صبح سویرے دعائیہ جلسہ منعقد کیا گیا۔ سوشل میڈیا پلیٹ فارم ایکس پر ایک پوسٹ میں کانگریس جنرل سکریٹری جئے رام رمیش نے اس کی تصویریں شیئر کی ہیں جہاں راہل گاندھی اور کئی دیگر لیڈران نے مہاتما گاندھی کو خراج عقیدت پیش کیا۔