سری نگر: سابق وزیر اعلیٰ غلام نبی آزاد نے اتوار کو کہا کہ وہ جموں و کشمیر کا لیفٹیننٹ گورنر بننے میں دلچسپی نہیں رکھتے، اس سلسلے میں چل رہی  "افواہوں" کوانہوں نے خارج کیا۔

کانگریس کے سابق رہنما نے کہا کہ وہ روزگار کی تلاش میں نہیں ہیں بلکہ جموں و کشمیر کے لوگوں کی خدمت کرنا چاہتے ہیں۔

غلام نبی آزاد نے اپنی ڈیموکریٹک پروگریسو آزاد پارٹی (ڈی پی اے پی) کے یوم تاسیس کے موقع پر ایک ریلی سے خطاب کرتے ہوئے کہا کہ میں نوکری کی تلاش میں (جموں و کشمیر) نہیں آیا ہوں، میں لوگوں کی خدمت کرنا چاہتا ہوں۔ 

انہوں نے کہا کہ "جب میں 2005 میں یہاں آیا تھا (بطور وزیر اعلی)، میں نے دو قیمتی (یونین) وزارتیں - ہاؤسنگ اور شہری ترقی اور پارلیمانی امور - لوگوں کی خدمت کے لیے چھوڑی تھیں۔ ایسا نہیں تھا کہ میں بے روزگار ہوں،"

غلام نبی آزاد نے کہا کہ بے روزگاری اور مہنگائی جموں و کشمیر کو درپیش دو اہم مسائل ہیں جنہیں وہ خطے کی سیاحتی صلاحیت سے فائدہ اٹھا کر حل کرنا چاہتے ہیں۔

"مہنگائی بڑھ رہی ہے۔ یہ سچ ہے کہ مہنگائی ہندوستان کے لیے مخصوص نہیں ہے۔ یورپ میں مہنگائی سب سے زیادہ ہے لیکن ان کے پاس اس سے نمٹنے کے لیے اور ذرائع ہیں۔ ہم ایک غریب ریاست ہیں۔"

انہوں نے کہا، "بے روزگاری بڑھ رہی ہے۔ نوکریاں نہیں ہیں۔ حکومت پوسٹوں کا اشتہار دے رہی ہے لیکن انٹرویو نہیں ہو رہے ہیں۔ تعلیم یافتہ نوجوانوں کے پاس نوکری نہیں ہے اور ان کے والدین نے اپنی تعلیم پر اپنی بچت ختم کر دی ہے،"

سابق وزیر اعلیٰ نے کہا کہ سیاحت معاشرے کے تمام طبقات کے لیے روزی روٹی فراہم کرنے کی صلاحیت رکھتی ہے۔

انہوں نے کہا، "ایک ٹیولپ گارڈن (جو 2007 میں بنایا گیا تھا) نے ہزاروں لوگوں کو روزی روٹی فراہم کی ہے۔ بطور وزیر اعلی، میں نے جموں اور کشمیر کے ہر ضلع میں 10 سے 12 سیاحتی مقامات کو تیار کرنے کا منصوبہ بنایا تھا،

انہوں نے مزید کہا، "میں نے لوگوں کو ہوم اسٹے کی سہولیات کے قیام کے لیے قرض فراہم کرنے کا منصوبہ بنایا تھا جس سے انہیں کمائی کے مواقع مل سکتے تھے۔"

2019 میں مرکز کے ذریعہ آرٹیکل 370 اور آرٹیکل 35 اے کی منسوخی کا حوالہ دیتے ہوئے، غلام نبی آزاد نے کہا کہ یہ ایک "بڑی غلطی" تھی۔

"کئی سالوں میں کچھ سیاسی غلطیاں ہوئیں جنہوں نے ریاست کو آگے جانے کے بجائے پیچھے دھکیل دیا۔ پچھلے نو سالوں میں ایک اور بڑی غلطی ہوئی - آرٹیکل 370 اور آرٹیکل 35A کو ہٹا دیا گیا۔"

غلام نبی آزاد نے پارٹی قائدین سے کہا کہ وہ مخالفین پر ذاتی حملے نہ کریں۔

 انہوں نے کہا.کہ "میں پہلے بھی کہہ چکا ہوں کہ ہمارے ساتھ سیاسی فراڈ ہوا لیکن میں کسی کی ظاہری شکل پر تبصرہ کیوں کروں؟"

انہوں نے جموں و کشمیر میں ڈرگ مافیا چلانے میں ملوث افراد کو سزائے موت دینے کا مطالبہ کیا۔

انہوں نے کہا کہ "منشیات کا استعمال ایک بڑا مسئلہ بن گیا ہے۔ بہت سے لوگ منشیات کا کاروبار کر کے کروڑ پتی بن گئے ہیں۔ انہیں پھانسی پر لٹکا دیا جانا چاہیے"۔