چلتی ٹرین کے ایمر جنسی ونڈو سے گرکر دو سالہ بچہ ہلاک

اطلاع کے مطابق ممبئی ، گو ا سے ہوتے ہوئے کیرلا کی جانب جارہی تری ویندرم ایکسپریس میں گجرات کے آنند ضلع سے تعلق رکھنے والے دو جوڑے بغرض سیاحت کیرلا جارہے تھے،آر اے اسی میں بک ان کی نشستیں ایمرجنسی ونڈو کے قریب تھیں، مہلوک بچے کے والد کوشل کے بیان کے مطابق وہ لگاتار اپنے بچے پر نگاہیں رکھے ہوئے تھے اور بچہ خالی کھڑکی کے قریب کھیل رہا تھا، پل بھر کے لئے جوتے کے تسمے ٹھیک کرنے کے لیے نیچے جھکے تو بچہ اس وقفے میں ونڈو سے باہر گر گیا تھا۔ ٹرین کو روک کر فوری بچے کو اُٹھایا گیا اور بھٹکل تھانے حدود میں پیش آئے اس حادثے کی وجہ سے بچے کو شروع میں نشاط اسپتال میں لایا گیا پھر وہاں سے سرکاری اسپتال منتقل کیا گیا جہاں اس کو مردہ قرار دیا گیا۔ بچے کی شناخت نمن (2)کی حیثیت سے کرلی گئی ہے۔ قبل نمازِ جمعہ بچے کو پوسٹ مارٹم کے لیے لے جایا گیا تھا جب کہ کیس درج کرانے کی کارروائی جاری تھی۔ بچے کا باپ کوشل پیشے سے چارٹڈ اکاؤٹنٹ (CA)ہے ۔ بچے کی ماں کو بڑی دیر کے بعد بچے کی موت کی اطلاع دی گئی ۔ بچے کو مردہ خانے میں رکھے دیکھ ماں کی نوحہ خوانی دیکھی نہیں جارہی تھی۔ بھٹکل پولس تھانے میں مقدمہ درج کرلیا گیا ہے۔