ایران کو کسی صورت ایٹمی ہتھیار تیار نہیں کرنے دیں گے، اسرائیل

پیرس / بیجنگ / تل ابیب :09مئی 2019(فکروخبر/ذرائع) اسرائیل کے وزیر اعظم بینجمن نیتن یاہو نے کہا کہ وہ ایران کو کسی صورت ایٹمی ہتھیار تیار کرنے نہیں دیں گے، جبکہ چین کا کہنا ہے کہ جوہری ڈیل پر مکمل عملدرآمد فریقین پر لازم ہے۔

تفصیلات کے مطابق ایران کی جانب سے جوہری ڈیل سے جزوی دستبرداری کے اعلان کے بعد شدید بین الاقوامی رد عمل سامنے آ رہا ہے۔میڈیارپورٹس کے مطابق روایتی حریف ملک اسرائیل کے وزیر اعظم بینجمن نیتن یاہو نے کہا کہ وہ ایران کو کسی صورت ایٹمی ہتھیار تیار کرنے نہیں دیں گے۔

فرانس نے تنبیہ کی کہ ایران منفی اقدامات سے باز رہے، فرانسیسی حکومت کے مطابق وہ اب بھی جوہری ڈیل کو بچانا چاہتی ہے۔ اسی دوران چین نے بھی کہا کہ جوہری ڈیل پر مکمل عملدرآمد لازمی ہے اور اس سلسلے میں ذمہ داری تمام فریقین پر عائد ہوتی ہے۔

چینی حکومت ایران پر عائد یکطرفہ امریکی پابندیوں کے خلاف ہے۔ ایک روسی قانون ساز نے بھی کہا کہ ایرانی اقدام در اصل امریکی دباؤ کا رد عمل ہے۔

یاد رہے کہ گزشتہ سال ایران نے اسرائیل کے اس دعوے کی تردید کی تھی جس میں الزام لگایا گیا تھا کہ ایران نے خفیہ طور پرایٹمی ہتھیار بنانے کی کوشش کی۔

اایرنی وزیرخارجہ جواد ظریف نے سماجی رابطے کی ویب سائٹ ٹویٹرپراپنے پیغام میں اسرائیل کی جانب سے ایران پرایٹمی ہتھیار بنانے کے حوالے سے لگائے جانے والے الزامات کی تردید کرتے ہوئے کہا تھا کہ یہ پرانے الزامات کی تکرار ہے جن سے اقوام متحدہ کا ایٹمی ہتھیاروں کی نگرانی کا ادارہ پہلے ہی نمٹ چکا ہے۔