طالبان نے امریکا سے مذاکرات میں پیش رفت کا عندیہ دے دیا

کابل:06مئی 2019(فکروخبر/ذرائع) افغان طالبان نے قطری دارالحکومت دوحہ میں ہونے والے مذاکرات میں پیش رفت کا عندیہ دیا ہے۔تفصیلات کے مطابق امریکا اور طالبان کے درمیان افغان امن عمل کی خاطر مذاکرات کا نیا دور کا سلسلہ شروع ہوچکا ہے، مرحلہ وار متعدد مذاکرات ہوں گے۔

غیر ملکی خبر رساں ادارے کے مطابق طالبان نے عندیہ دیا ہے کہ امریکا کے ساتھ مذاکرات میں اختلافات کم ہورہے ہیں، غیر ملکی فوجی انخلا پر بھی بات جیت جاری ہے۔

طالبان کی جانب سے جاری کردہ بیان میں کہا گیا ہے کہ امریکی نمائندہ خصوصی زلمے خلیل زاد کے سامنے تجاویز رکھی گئی ہیں جس پر تبادلہ خیال ہوا تاہم کوئی بھی فیصلے کو حتمی شکل دینے کے لیے مزید ملاقاتیں درکار ہوں گی۔

غیر ملکی میڈیا نے دعویٰ کیا ہے کہ کسی طالبان رہنما نے نام ظاہر نہ کرنے کی شرط پر بتایا ہے کہ امریکا اپنے 14 ہزار فوجیوں کے انخلا کے لیے ڈیڑھ سال کی مہلت چاہتا ہے، جس پر طالبان راضی نہیں ہیں۔امریکا حکام نے طالبان پر زور دیا ہے کہ وہ شدت پسند کارروائیاں بھی ختم کرے۔

خیال رہے کہ گذشتہ روز ہی افغانستان کے شمالی صوبے بغلان کے شہر پل خمری میں طالبان نے پولیس ہیڈ کوارٹر پر بارود سے بھری گاڑی کے ساتھ حملہ کیا، جس میں 13 سیکورٹی اہل کار ہلاک ہوگئے۔

یہ حملہ ایسے وقت میں کیا گیا ہے جب افغانستان میں کل سے رمضان کا آغاز ہو رہا ہے، تین دن قبل لویہ جرگہ کے اجلاس میں طالبان کے ساتھ جنگ بندی کی قرارداد بھی منظور کی گئی ہے۔