جاپان اور امریکہ کا شمالی کوریا کے خلاف پابندیاں برقرار رکھنے پر اتفاق

پیانگ یانگ کے جوہری ہتھیاروں سے دستبرداری کے لئے اس پر دباؤ برقرار رکھنا ضروری ہے ، مائیک پینس 

ٹوکیو:13؍نومبر2018(فکروخبر/ذرائع)جاپان اور امریکہ نے ایک بار پھر شمالی کوریا کے خلاف پابندیاں برقرار رکھنے کی یقین دہانی کی ہے ۔غیر ملکی خبررساں ادارے کے مطابق ملکی دورے پر ائے ہوئے امریکی نائب صدر مائیک پینس سے بات چیت کے دوران جاپانی وزیر اعظم شینزواپے نے اس بات پر اتفاق کیا کہ شمالی کوریا کے خلاف جوہری ہتھیاروں سے دستبرداری تک پابندیاں برقرار رکھنا صورت حال کا تقاضا ہے ۔ ملاقات کے دوران دونون عہدیداروں نے توانائی ، انفراسٹرکچر اور خطے کے ممالک کو قرض کی فراہمی میں دوطرفہ تعاؤن کے فروغ پر بھی اتفاق کیا ۔ امریکی نائب صدر نے اس موقع پر کہا کہ خطے میں امن و خوشحالی کے لئے امریکہ جاپان تعاؤن انتہائی اہمیت کا حامل ہے انہوں نے کہا کہ جاپان نہ صرف امریکہ کا اتحادی بلکہ قریبی دوست ملک بھی ہے تاہم انہوں نے کہا کہ جاپان کو ہتھیاروں کے پروگرام کا دائرہ محدود کرنے کے لئے ڈومور کی ضرورت ہے ۔