بریگزٹ کا معاملہ وزراء کے استعفے سے ختم نہیں ہو گا،صدر یورپی کونسل

برسلز:10؍جولائی2018(فکروخبر/ذرائع) یورپی کونسل کے صدر ڈونلڈ ٹسک نے کہا ہے کہ بریگزٹ سے پیدا ہونیوالی پیچیدگیوں کا خاتمہ برطانوی وزراء کے استعفوں سے ممکن نہیں۔منگل کو ڈونلڈ ٹسک نے برطانوی وزیر خارجہ بورس جانسن کے مستعفی ہونے پر اپنا ردعمل ظاہر کرتے ہوئے مزید کہا کہ سیاستدانوں کا آنا جانا ایک معمول کا عمل ہے،تاہم کئی ایک رخصت ہوتے وقت اپنے لوگوں کیلئے مشکلات چھوڑ جاتے ہیں۔ قبل ازیں انہوں نے ڈیوڈ ڈیوس کے مستعفی ہونے پر کہا تھا کہ بریگزٹ کا مسئلہ ابھی بھی اپنے حل سے بہت دور ہے اور یہ افسوسناک ہے کہ ڈیوس کے استعفے کیساتھ بریگزٹ کا معاملہ ختم نہیں ہوا ہے۔