کعبۃ اللہ شریف کی تصویر کے ساتھ بدتمیزی کرکے فیس بک پر پوسٹ کرنے والا نوجوان گرفتار

فکروخبر کے مطابق جیونت نائک نامی ایک نوجوان نے کعبہ کی تصویر کے ساتھ بدتمیزی کرکے مسلمانوں کو جذبات کو مجروح کرانے کی غرض سے سوشیل میڈیا کی ویب سائٹ فیس بک پر متنازعہ تصویر پوسٹ کی تھی جس کے بعد ہوناور کی چنداور جماعت نے ہوناور پولیس تھانہ پہنچ کر اس کی شکایت کی تھی اور جلد از جلد ملزم کی گرفتاری کا مطالبہ کیا تھا لیکن نوجوان کی گرفتاری عمل میں نہ آنے کی وجہ سے مرڈیشور کے نوجوانوں نے جماعت کے ذمہ داران سے اس بات کی شکایت کی اور اس مسئلہ کو سنجیدگی سے لیتے ہوئے اس سلسلہ میں قدم اٹھانے کا مطالبہ کیا جس کے بعد مرڈیشور جماعت کے ذمہ داران نے بھی مرڈیشور پولیس تھانہ پہنچ کر ایک یادداشت پیش کی اور فیس بک کر متنازعہ پوسٹ کرکے مسلمانوں کے جذبات کو مجروح کرنے اور ہندومسلم بھائی چارگی کے درمیان دراڑیں پیدا کرنے والے نوجوان کے خلاف فوری کارروائی کامطالبہ کیا ۔ بتایا جارہا ہے کہ یادداشت کی ایک کاپی اعلیٰ افسران کو بھی بھیجی گئی اور مسلمانوں کے جذبات کے ساتھ کھلواڑ کرنے والے اس سازشی کو گرفتار کرنے کا مطالبہ کیا گیا ۔ چنداور جماعت اور اس کے بعد مرڈیشور جماعت کی جانب سے کی گئی پیش رفت کے بعد حالات پرامن رکھنے کے لیے پولیس مذکورہ ملزم کو آج جمعرات کے روز گرفتار کرنے میں کامیاب ہوگئی ہے۔ عوام کا مانناہے کہ ہندومسلم اتحاد کے اس پرامن ماحول میں شرارت کرکے ماحول بگاڑنے والوں کے خلاف پولیس سخت سے سخت کارروائی کرے تاکہ آئندہ اس طرح کی گھناؤنی حرکتوں سے ہندومسلم اتحاد میں فرقہ واریت کی بیچ بونے کی کوئی ہمت نہ کرسکے۔ غیر مسلم برداران کی ایک بڑی تعداد نے بھی فیس بک پر متنازعہ پوسٹ پر تشویش کا اظہار کرتے ہوئے ملزم کے خلاف سخت کارروائی کا مطالبہ کیا ہے۔