مولانا مصطفی رفاعی ندوی کے ہاتھوں فکروخبر کوچنگ سینٹر کاافتتاح

مولانا نے کہا کہ فکروخبر اس کوچنگ سینٹر کے شعبوں کا دائرہ وسیع کرے اور طالبات کے لیے بھی خصوصی کلاسس کا اہتمام کرے جس سے ہماری بہنوں میں بھی دین کی عظمت پیدا ہوگی اور دین کی افادیت اور اس کی ضرورت ان کے سامنے آئے گی جس سے ہمارے آنے والی نسل دیندار بن جائے گی ۔ مولانانے فکروخبر سے جڑے افراد سے کہا کہ اخلاص کے ساتھ اس کام کو انجام دیتے رہیں اور اس دوران پیش آنے والی تکالیف پر صبر کرتے ہوئے اللہ تعالیٰ سے اس بات کی امید رکھیں کہ آنے والے دنوں میں راستے کھلتے چلے جائیں گے اور اللہ تعالیٰ اس کی مقبولیت میں اضافہ کرے گا۔ مولانا باقر صاحب قاسمی نے فکروخبر کے کاموں کا سراہتے ہوئے کہاکہ ادارہ کی جانب سے اٹھایا جانے والا یہ قدم قابلِ تعریف ہے ، میں سمجھتا ہوں کہ فکروخبر کے ذریعہ سے نہ صرف ہندوستان بلکہ عالم میں خیر وجود میں آئے گا۔ اس موقع پر فکروخبر کے ایڈیٹر انچیف مولانا سید ہاشم نظام ندوی نے کوچنگ سینٹر کے قیام کے مقاصد پر روشنی ڈالتے ہوئے کہا کہ یہاں طلباء کو تعلیمی فائدے کے ساتھ دین کا فائدہ بھی ہوگا ۔ دس پندرہ منٹ بھی قرآن اور دعائیں سکھانے کے لیے مختص کیے جائیں تو اس کے ذریعہ سے ہمارے طلباء کے اندر دین بھی آئے گا ۔ ایڈیٹر انچیف نے مزید کہا کہ اس کے علاوہ یہاں خصوصی کلاسس کا اہتمام کیا جائے گااور باقاعدہ ان کو اس کورس کی سند بھی دی جائے گی۔ اس موقع پر فکروخبر کے ایڈیٹر مولانا انصار عزیز ندوی نے نظامت کے فرائض انجام دئے تھے جب کہ فکروخبر عملہ کے علاوہ خصوصی مدعوئین اس افتتاحی نشست کے عینی شاہد بنے ۔