تل ابیب:09/جون/2024ء(فکروخبر/ذرائع) اسرائیلی فوج نے دعویٰ کیا ہے کہ گزشتہ برس اکتوبر میں یرغمال بنائے گئے 4 اسرائیلی شہریوں کو بازیاب کرا لیا گیا۔

الجزیرہ کے مطابق اسرائیلی فوج کے ترجمان ڈینیل ہگاری نے ایک بیان میں کہا ہے کہ 7 اکتوبر 2023 کو یرغمال بنائے گئے 4 اسرائیلیوں کو غزہ کے 2 مختلف مقامات سے بازیاب کرا لیا گیا ہے، بازیابی کے بعد انھیں طبی معائنے کے لیے اسپتال منتقل کیا جا رہا ہے۔

فوجی ترجمان نے کہا کہ مشن میں غزہ کی دو الگ الگ عمارتوں سے چار اسیروں کو بازیاب کرایا گیا، انھوں نے بتایا کہ اس آپریشن سے قبل ہفتوں تک معلومات اکٹھی کی گئیں، اور مشن میں شامل اہل کاروں کو سخت تربیت دی گئی۔

انھوں نے کہا یہ ایک ’ہائی رسک مشن‘ تھا جو دن کی روشنی میں کیا گیا، اور یہ ایک ہیلی کاپٹر کی مدد سے کیا گیا۔ ترجمان کا کہنا تھا کہ 120 یرغمالی تاحال غزہ میں قید ہیں۔ غیر ملکی میڈیا رپورٹس کے مطابق نوا ارگمانی ان چار یرغمالیوں میں سے ایک ہے جسے اسرائیلی فوج نے ہفتے کے روز بازیاب کرایا ہے۔

واضح رہے کہ 7 اکتوبر سے غزہ پر اسرائیل کی جارحیت میں اب تک کم از کم 36,801 فلسطینی شہید اور 83,680 زخمی ہو چکے ہیں۔ اقوام عالم کی شدید مخالفت کے باوجود غزہ کے علاقوں پر اسرائیلی فورسز کے وحشیانہ حملے جاری ہیں، رفح میں کویت کے اسپیشلٹی اسپتال کے ڈائریکٹر نے کہا ہے کہ اسرائیلی فوج کے ہاتھوں مارے جانے والے فلسطینیوں کی سڑکوں پر درجنوں لاشیں پڑی ہیں اور امدادی کارکن زخمیوں تک نہیں پہنچ پا رہے ہیں۔