شیموگہ 29؍ نومبر 2023 : بھدراوتی تعلقہ میں شدید بارش کے بعد ایک المناک واقعہ میں منگل کی رات دو بھائی  آسمانی بجلی گرنے سے اپنی جان سے ہاتھ دھوبیٹھے ہیں جن کی شناخت 32 سالہ بیرو اور 35 سالہ سریش کے طور پر کی گئی ہے۔

بھدراوتی کے گولیگارا کیمپ میں رہنے والے کسانوں نے حال ہی میں جو دھان کاشت کیا تھا اس کی کٹائی کی تھی اور اسے اپنے کھیت میں ڈھیر کیا تھا۔ علاقے میں شدید بارش کی وجہ سے کٹے ہوئے دھان کو ہونے والے ممکنہ نقصان کے بارے میں فکرمند، بیرو اور سریش نے منگل کی رات اپنی پیداوار کی حفاظت کے لیے کھیت کا دورہ کیا لیکن افسوسناک طور پر آسمانی بجلی کے زد میں آگئے۔

یہ واقعہ اس وقت منظر عام پر آیا جب بھائیوں کے واپس نہ آنے پر گھر والوں نے تشویش میں مبتلا ہو کر تلاش شروع کی۔

بھدراوتی دیہی پولیس کو اطلاع دی گئی، اور میدان میں پہنچ کر انہوں نے معائنہ کیا۔ بیرو اور سریش کی لاشوں کو بعد میں پوسٹ مارٹم کے لیے بھدراوتی کے سرکاری اسپتال منتقل کیا گیا۔