بنگلورو:12؍ ستمبر2023 (فکروخبرنیوز) وزیر اعلیٰ سدارامیا نے ضلع اور تعلقہ مراکز کے عہدیداروں کو ایک ہدایت جاری کی ہے جس میں گھر سے کام (work fram home) کے بجائے اپنے متعلقہ دفاتر سے کام کرنے کی اہمیت پر زور دیا ہے۔ ودھانا سودھا کانفرنس ہال میں ضلع کمشنروں اور ضلع پنچایت کے چیف ایگزیکٹیو افسران کے ساتھ میٹنگ کے دوران وزیر اعلیٰ نے سختی سے اپنا پیغام دیا۔

سدارامیا نے عوام کی بہتر خدمت کے لیے عہدیداروں کو اپنے دفاتر میں جسمانی طور پر موجود رہنے کی ضرورت پر زور دیا۔ انہوں نے شہریوں، ایم ایل ایز اور وزراء کی جانب سے فون کالز کے ذریعے عہدیداروں کی عدم دستیابی کی شکایات پر اپنی تشویش کا اظہار کیا۔ چیف منسٹر نے اس بات پر زور دیا کہ عہدیداروں کے لئے قابل رسائی اور جوابدہ ہونا ضروری ہے، چاہے وہ کال کرنے والا کوئی بھی ہو، چاہے وہ اس کے دفتر سے ہو، وزراء، ایم ایل اے، یا عام عوام۔

سدارامیا نے تاکید کی کہ جو لوگ عوامی خدمت میں ہیں وہ ہمدرد اور انسانی مزاج کے مالک ہونے چاہئیں۔ انہوں نے عہدیداروں کو غفلت اور لاپرواہی کے خلاف خبردار کرتے ہوئے اس بات پر زور دیا کہ ان کے کسی فعل سے حکومت کی ساکھ داغدار نہیں ہونی چاہیے۔

وزیر اعلیٰ نے ریاست میں کسانوں کی خودکشی کے معاملے پر توجہ دی، اور انکشاف کیا کہ 251 معاملے رپورٹ ہوئے ہیں، جن میں سے 174 پہلے ہی حل ہو چکے ہیں۔ انہوں نے بقیہ مقدمات کے حل اور معاوضوں کی بروقت تقسیم کی خواہش کا اظہار کیا۔

وزیر اعلیٰ نے محکمہ صحت میں ڈاکٹروں کی عدم دستیابی اور پیرا میڈیکل اہلکاروں کی جانب سے کوالیفائیڈ ڈاکٹروں کے بدلے ادویات تجویز کرنے کے عمل پر تشویش کا اظہار کیا۔ سدارامیا نے ڈاکٹروں کو ہدایت دی کہ وہ اپنے متعلقہ مراکز میں تعینات رہیں اور لوگوں کی صحت کی دیکھ بھال کی ضروریات کو مؤثر طریقے سے پورا کریں۔