ہیروشیما: 21/مئی/2023(فکروخبر/ذرائع)برطانوی وزیر اعظم رشی سُناک نے یوکرینی صدر ولودیمیر زیلنسکی کو ’گڈ ٹو سی یو‘ کہہ دیا۔

غیر ملکی میڈیا رپورٹس کے مطابق رشی سناک نے جاپانی شہر ہیروشیما میں جی 7 سربراہی اجلاس میں ولودیمیر زیلنسکی کو گلے لگایا اور انھیں بتایا کہ ’یوکرین، ہم کہیں نہیں جا رہے۔‘

ایک دوسرے کو گلے لگا کر سلام کرنے کے بعد برطانوی وزیر اعظم نے زیلنسکی کی پیٹھ تھپتھپاتے ہوئے کہا ’’آپ کو دیکھ کر اچھا لگا، آپ نے کر دکھایا۔‘‘

رشی سناک کا اشارہ ایف 16 طیاروں کی طرف تھا، اس ملاقات سے کچھ ہی دیر قبل امریکا نے یوکرین کو پیوٹن سے لڑنے کے لیے ایف سولہ لڑاکا طیاروں کی فراہمی سے متعلق رضامندی ظاہر کی تھی، اور جی سیون ممالک نے بھی اس پر اتفاق کیا۔

برطانوی وزیر اعظم اور یوکرینی صدر کے مابین حال میں قریبی تعلق پیدا ہوا ہے، جس کی وجہ سے وہ ایک دوسرے کو ان کے پہلے ناموں سے پکار رہے ہیں، رشی سناک نے صدر زیلنسکی کو بتایا کہ روس کے ساتھ تنازع میں ان کی قوم کی حمایت ’کہیں نہیں جا رہی۔‘

واضح رہے کہ پاکستان میں بھی ’گڈ ٹو سی یو‘ کے الفاظ ان دنوں میڈیا کے زینت بن رہے ہیں، چیف جسٹس نے عمران خان کو دیکھ کر یہ الفاظ کہے تھے، جس کے بعد ان پر اس حوالے سے تنقید بھی ہوئی۔