لکھنؤ:30 جنوری2023(فکروخبر/ذرائع)این آئی اے / اے ٹی ایس کے خصوصی جج وویکانند شرن ترپاٹھی نے گورکھ ناتھ مندر کی حفاظت میں تعینات پی اے سی کے جوانوں پر حملے اور دہشت گردانہ سرگرمیوں میں ملوث ہونے کے معاملے میں ملزم احمد مرتضیٰ عباسی کو موت کی سزا سنائی ہے۔

واضح رہے کہ کہ 27 جنوری کو این آئی اے/اے ٹی ایس کی خصوصی عدالت نے گورکھ ناتھ مندر کی حفاظت میں تعینات پی اے سی جوانوں پر حملے کے معاملے میں ملزم احمد مرتضیٰ عباسی کو مجرم قرار دیا تھا۔ خصوصی جج وویکانند شرن ترپاٹھی نے سزا پر سماعت کے لیے 30 تاریخ مقرر کی تھی۔

4 اپریل 2022 کو اس معاملے کی رپورٹ ونے کمار مشرا نے گورکھ ناتھ پولیس اسٹیشن میں درج کرائی تھی۔ ان کے مطابق گورکھ ناتھ مندر کی حفاظت پر تعینات پی اے سی جوان انیل کمار پاسوان کو ملزم احمد مرتضیٰ عباسی نے اچانک حملہ کر کے شدید زخمی کر دیا۔ اس کا ہتھیار بھی چھیننے کی کوشش کی۔ اس کی رائفل سڑک پر گر گئی تھی۔ جب دوسرا سپاہی اسے بچانے آیا تو اسے بھی مارنے کی نیت سے دھاردار ہتھیار سے حملہ کیا گیا۔

موقع پر موجود دیگر پولیس اہلکاروں نے زخمی جوان اور اس کی رائفل کو اٹھایا۔ اس دوران ملزم اسلحہ لہراتے ہوئے اللہ اکبر کے نعرے لگاتے ہوئے پی اے سی چوکی کی طرف بھاگا۔ جس سے لوگوں میں خوف و ہراس پھیل گیا۔ اس کا ہاتھ ایک بڑے بانس سے ٹکرا گیا جس کی وجہ سے اس کے ہاتھ سے اسلحہ گر گیا۔ پھر ملزم کو پکڑ لیا گیا۔

سرکاری وکیل ایم کے سنگھ کے مطابق، تحقیقات کے دوران حاصل شواہد کی بنیاد پر اس معاملے میں غیر قانونی سرگرمیوں کی روک تھام کے قانون کی دفعہ 16/18/20/40 کی درخواست کی گئی تھی۔ جانچ اے ٹی ایس کو سونپی گئی۔ اسے 25 اپریل 2022 کو خصوصی عدالت میں پیش کرکے، اے ٹی ایس نے اس کا عدالتی اور پولس حراستی ریمانڈ بھی حاصل کیا تھا۔