ماسک نہیں پہنوں گا، خریدار نے سپر اسٹور کے سیکورٹی گارڈ کو گولی مار دی

مشی گن:04مئی 2020(فکروخبر/ذرائع ) امریکا میں خریدار نے بغیر ماسک لگائے سپر اسٹور میں داخل ہونے کی کوشش کے دوران تلخ کلامی پر سیکورٹی گارڈ کو فائرنگ کر کے ہلاک کر دیا۔

تفصیلات کے مطابق امریکی ریاست مشی گن کے شہر فلنٹ میں ڈالر سپر اسٹور پر کسٹمر کی فائرنگ سے 43 سالہ سیکورٹی گارڈ جان کی بازی ہار گیا۔

سوشل میڈیا پر وائرل ہونے والی ویڈیو میں دیکھا جا سکتا ہے کہ سپراسٹور کے دروازے پر کھڑے سیکورٹی گارڈ اور خریدار کے درمیان تلخ کلامی جاری ہے اور اسی دوران کسٹمر نے گارڈ پر فائرنگ کر دی۔

عینی شاہدین نے دعویٰ کیا ہے کہ سیکورٹی گارڈ نے شہری کو ماسک لگائے بغیر اسٹور میں داخل ہونے سے منع کیا تھا جس پر تلخ کلامی ہوئی۔ پولیس نے گارڈ کی ہلاکت کا مقدمہ درج کر لیا ہے تاہم فی الحال کوئی گرفتاری عمل میں نہیں آئی۔

واضح رہے کہ دنیا بھر میں کرونا وائرس سے متاثرہ افراد کی تعداد 35 لاکھ سے تجاوز کر گئی ہے جبکہ اموات کی تعداد بھی 2 لاکھ 48 ہزار سے زیادہ ہو گئی ہے۔

امریکا میں کرونا وائرس کے مصدقہ مریضوں کی تعداد 11لاکھ 88 ہزار سے زائد ہوچکی ہے جبکہ ہلاک افراد کی تعداد ساڑھے 68 ہزار سے اوپر ہوچکی ہے۔