آرٹیکل ۳۷۰ کی منسوخی کے ۱۴۵ دنوں بعد کارکل میں انٹرنیٹ خدمات بحال ، کشمیر میں پابندی برقرار

کرگل :28دسمبر2019(فکروخبر/ذرائع)حکومت نے مرکز کے زیر انتظام لداخ کے ضلع کرگل میں جمعہ کے روز 145 دنوں کے بعد موبائل انٹرنیٹ سروس بحال کردی گئی جبکہ لداخ کے بودھ اکثریتی ضلع لیہہ میں مرکزی حکومت کے پانچ اگست کے فیصلوں کے چند روز بعد ہی انٹرنیٹ خدمات بحال کی گئی تھیں۔ تاہم کشمیر میں تمام طرح کی انٹرنیٹ سروسز 5 اگست سے مسلسل معطل ہیں۔

بتادیں کہ مرکزی حکومت کی طرف سے پانچ اگست کے جموں کشمیر کو دفعہ 370 اور دفعہ 35 اے کے تحت حاصل خصوصی اختیارات کی تنسیخ اور ریاست کو دو وفاقی حصوں میں منقسم کرنے کے فیصلوں کے پیش نظر جموں و کشمیر اور خطہ لداخ میں تمام طرح کی انٹرنیٹ سروسز معطل کی گئی تھیں اگرچہ لداخ کے ضلع لیہہ میں انٹرنیٹ سروس چند روز کے بعد ہی بحال کی گئی تھی تاہم کرگل میں فی الوقت موبائل انٹرنیٹ سروس بند ہی تھی اور کشمیر میں تمام طرح کی انٹرنیٹ سروسز ہنوز بند ہی ہیں۔

ذرائع نے یو این آئی اردو کو بتایا کہ لداخ کے ضلع کرگل میں گزشتہ چار ماہ کے دوران حالات سازگار رہنے کے پیش نظر موبائل انٹرنیٹ سروس بحال کی گئی تاہم ضلع میں براڈ بینڈ انٹرنیٹ سروس پہلے ہی بحال کی گئی تھی۔

انہوں نے کہا کہ مقامی مذہبی لیڈروں نے لوگوں سے انٹرنیٹ سہولیت کا ناجائز استعمال کرنے سے احتراز کرنے کی اپیل کی ہے۔ ادھر لداخ کے ضلع کرگل میں انٹرنیٹ سہولیات کی بحالی کے لئے ضلع سے تعلق رکھنے والے طلبا جموں اور کرگل میں کئی بار بر سر احتجاج ہوئے تھے۔ احتجاجیوں کا کہنا تھا کہ انٹرنیٹ کی معطلی سے طلبا کو گوناگوں مشکلات کا سامنا ہے اور وہ مختلف امتحانوں کی مکمل تیاریاں کرنے سے معذور ہیں۔

دریں اثنا اگرچہ لداخ کے دونوں ضلعوں میں تمام طرح کی انٹرنیٹ سروس بحال کی گئی ہیں تاہم جموں میں موبائل انٹرنیٹ سروس اور کشمیر میں تمام طرح کی انٹرنیٹ سروسز مسلسل معطل ہیں جس کے باعث یہاں لوگوں بالخصوص صحافیوں، طلبا اور تاجروں کو گوناگوں مشکلات کا سامنا ہے۔

صحافیوں کے لئے محکمہ اطلاعات و تعلقات عامہ کے ایک چھوٹے کمرے میں قائم 'میڈیا سینٹر' پیشہ ورانہ کام کی انجام دہی کا واحد ذریعہ ہے جبکہ طلبا کو اسکالر شپ فارم، داخلہ فارم یا امتحانی فارم جمع کرنے میں متنوع دقتوں کا سامنا کرنا پڑ رہا ہے۔

قابل ذکر ہے کہ وادی میں انٹرنیٹ کی بحالی کے لئے کئی بار افواہیں گرم ہوئیں اور ارباب اقتدار نے بھی کئی بار کم سے کم براڈ بینڈ انٹرنیٹ سروس مرحلہ وار طریقے سے بحال کرنے کے وعدے کیے، تاہم زمینی سطح پر فی الوقت صورتحال جوں کی توں ہی ہے۔