فرانس کی کیمیائی حملہ کے ذمہ دار کے تعین کیلئے مجوزہ میکانزم پر اتحادیوں سے مشاورت

گذشتہ سال نومبر میں روس نے ان کے مینڈیٹ میں توسیع سے متعلق قرار داد کو ویٹو کردیا تھا

پیرس:06؍مئی 2018(فکروخبر/ذرائع)مغربی طاقتیں کیمیائی ہتھیاروں کے حملوں کے ذمے داروں کے تعین کیلئے فرانس کی پیش کردہ نئی تجویز کا جائزہ لے رہی ہیں۔فرانس نے نیدر لینڈز میں قائم کیمیائی ہتھیاروں کے امتناع کی تنظیم (او پی سی ڈبلیو)کے تحت ایک نیا میکانزم وضع کرنے کی تجویز پیش کی ہے۔ہیگ میں قائم او پی سی ڈبلیو اپنے موجودہ نظم کے تحت صرف کیمیائی حملوں کی نشان دہی کرسکتی ہے کہ ایسا کوئی حملہ ہوا ہے لیکن کیمیائی ہتھیار سے حملہ کس نے کیا تھا، اس کی نشان دہی کرنا اس کے دائرہ کار میں نہیں آتا ہے۔نئے میکانزم کے تحت او پی سی ڈبلیو حملے کے ذمے داروں کا تعین کرسکے گی۔واضح رہے کہ شام میں او پی سی ڈبلیو اور اقوام متحدہ مشترکہ طور پر 2015 سے کیمیائی ہتھیاروں کے حملوں کی تحقیقات کررہی تھیں لیکن گذشتہ سال نومبر میں روس نے ان کے مینڈیٹ میں توسیع سے متعلق قرار داد کو ویٹو کردیا تھا۔