سری نگر:13/اگست 2022(فکروخبرنیوز/ذرائع)جموں وکشمیر حکومت نے آئین ہند کی دفعہ 311 کے تحت چار سرکاری ملازموں کو ملک مخالف سرگرمیوں میں ملوث ہونے کے الزام میں نوکریوں سے بر طرف کرنے کے احکامات صادر کئے ہیں۔ نوکریوں سے بر طرف کئے جانے والوں میں متحدہ جہاد کونسل کے سربراہ سید صلاح الدین کا بیٹا اور جموں وکشمیر لبریشن فرنٹ لیڈر بٹہ کراٹے کی زوجہ شامل ہیں۔

سرکاری حکمنامے کے مطابق دستیاب معلومات کی بنیاد پر اور کیسوں کے حقائق و حالات کا جائزہ لینے کے بعد لیفٹیننت گورنر منوج سنہا کو اطمینان ہوا ہے کہ مذکورہ ملازموں کی سرگرمیاں اس نوعیت کی ہیں کہ انہیں نوکریوں سے بر طرف کر دیا جائے۔

برطرف کئے جانے والے ملازموں میں کشمیر یونیورسٹی کے شعبہ کمپیوٹر سائنس کے سائنس داں ڈاکٹر محیط احمد بٹ، شعبہ منیجمنٹ اسٹیڈیز کے سینئر اسسٹننٹ پروفیسر ماجد حسین قادری، جے کے ای ڈی آئی کے آئی ٹی منیجر سید عبد المعید اور محکمہ دیہی ترقی کی ڈی پی او پبلسٹی اصابہ الارجمند خان شامل ہیں۔

سید عبدالمعید متحدہ جہاد کونسل کے سربراہ سید صلاح الدین کے بیٹے ہیں، جبکہ اصابہ الارجمند جموں وکشمیر لبریشن فرنٹ کے لیڈر اور سابق ملی ٹنٹ کمانڈر فاروق احمد دار المعروف بٹہ کراٹے کی زوجہ ہیں۔