:05؍مئی 2021(فکروخبرنیوز/ذرائع)سپریم کورٹ نے اپنے ایک اہم فیصلہ میں مراٹھا ریزرویشن کو غیر آئینی قرار دیا ہے۔ سپریم کورٹ نے کہا ہے کہ ریزرویشن 50 فیصد سے زیادہ نہیں ہوسکتا۔ سپریم کورٹ نے اپنے فیصلے میں واضح کیا ہے کہ مراٹھا برادری کو تعلیمی اور معاشرتی طور پر پسماندہ قرار دیئے جانے والے زمرے میں نہیں لایا جاسکتا۔

بدھ کے روز بمبئی ہائی کورٹ کے فیصلے کو چیلنج کرنے والی درخواستوں پر سپریم کورٹ نے یہ فیصلہ دیا ہے، بمبئی ہائی کورٹ نے ریاست میں تعلیمی اداروں اور سرکاری ملازمتوں میں مراٹھوں کے لئے ریزرویشن کو برقرار رکھا تھا۔ جسٹس اشوک بھوشن کی سربراہی میں پانچ ججوں کی آئین بنچ نے یہ فیصلہ سنایا ہے۔

واضح رہے کہ سپریم کورٹ نے 26 مارچ کو درخواستوں پر اپنا فیصلہ محفوظ کرلیا تھا۔ اس معاملے پر طویل سماعت میں دائر کردہ ان حلف ناموں پر بھی غور کیا جائے گا کہ آیا 1992 کے اندرا ساہنی فیصلے ( جسے منڈل فیصلہ بھی کہا جاتا ہے ) پر بڑی بینچ کے ذریعہ دوبارہ غور کرنے کی ضرورت ہے، جس میں ریزرویشن کی حد 50 فیصد رکھی گئی تھی۔

آئین بنچ نے 15 مارچ سے کیس کی سماعت شروع کی تھی۔ ہائی کورٹ نے جون 2019 میں اس قانون کو برقرار رکھتے ہوئے کہا تھا کہ 16 فیصد ریزرویشن مناسب نہیں ہے اور ملازمت میں ریزرویشن 12 فیصد سے تجاوز نہیں کرنا چاہئے اور نامزدگی میں یہ 13 فیصد سے تجاوز نہیں ہونا چاہئے۔