:02 جون2020(فکروخبر/ذرائع)کسی سڑک حادثے میں مر رہے لوگوں کو بچانے کی جگہ انسان اگر شراب لوٹنے پر آمادہ ہو تو اسے انسانیت کو شرمسار کرنے والا واقعہ ضرور کہا جائے گا، ایسا ہی ایک واقعہ ارریہ میں پیش آیا جہاں دیر شب جوکی ہاٹ - ارریہ قومی شاہراہ سے متصل بوریا پل کے پاس شراب سے لدی اسکارپیو گاڑی نے موٹر سائیکل کو زبردست ٹکر مار دی جس میں جائے وقوع پر ہی دو لوگوں کی موت ہو گئی جبکہ ایک خاتون اپنی زندگی کے لئے تڑپتی رہی، اور گاڑی ڈرائیور وہاں سے فرار ہو گیا۔

موٹرسائیکل پر سوار رحیم اپنی والدہ رحمتی اور پڑوس کی ایک خاتون کو ایک ہی موٹرسائیکل پر لے کر لڑکی دیکھنے ارریہ آئے تھے، لوٹنے کے دوران جوکی ہاٹ کی طرف سے انتہائی تیز رفتاری کے ساتھ آ رہی اسکارپیو گاڑی نے بوریا پل کے پاس موٹرسائیکل کو ٹکر مار دی، اس زوردار ٹکر میں رحیم و اس کی والدہ جائے وقوع پر ہی فوت ہوگئیں جبکہ دوسری خاتون بی بی خدیجہ وہیں پر تڑپ رہی تھیں۔

گاڑی میں زوردار ٹکر کی آواز سن کر اردگرد کے لوگ وہاں پر کافی تعداد میں جمع ہوگئے، مگر جیسے ہی انہیں بھنک لگی کہ گاڑی میں شراب ہے تو لوگ تڑپ رہی خاتون کو بچانے کے بجائے شراب لوٹنے میں لگ گئے۔

موقع پر پہنچے جوکی ہاٹ اسمبلی حلقہ کے رکن اسمبلی شاہنواز عالم نے جوکی تھانہ کو واقعہ کی اطلاع دی، پولیس نے لاش کو اپنے قبضے میں لے کر پوسٹ مارٹم کے لئے ارریہ صدر اسپتال بھیج دیا اور تڑپ رہی خاتون کو علاج کے لئے صدر ہسپتال بھیجا، جہاں خاتون بھی راستے میں دم توڑ بیٹھی۔

اس کے بعد بھی لوگ شراب لوٹنے کے لئے پاگل بنے رہے حالانکہ کچھ لوگوں کی شراب لوٹنے والوں سے جھڑپ بھی ہوئی۔ جس کسی نے بھی شراب لوٹ رہے لوگوں کی ایسی حرکت دیکھی وہ خود شرم سے پانی پانی ہوگیا۔

آج ہمارا سماج اتنا بے حس ہو گیا ہے، جہاں انسان کی جان بچانے کے بجائے شراب لوٹنا اولین ترجیح ہو گئی ہے۔ انسانیت کو شرمسار کرنے والے یہ واقعہ فی الوقت پورے علاقے میں موضوعِ بحث ہے۔تینوں ہلاک شدہ افراد کو سپرد خاک کر دیا گیا۔

جائے حادثے پر پہنچنے والے لوگ اگر انسانیت کا فرض نبھاتے ہوئے تڑپ رہی خاتون کو فوری طور پر ہسپتال لے جاتے تو شاید اس کی زندگی بچ سکتی تھی۔ آج اس خاتون کے اہل خانہ یہی سوچ کر سماج کے لوگوں سے سوال پوچھ رہے ہیں کیا ان کے لئے انسان کی جان بچانے سے زیادہ شراب لوٹنا اہم تھا؟