ಶಾರ್ಟ್ ಸರ್ಕಿಟಿನಿಂದ ಮನೆಯಲ್ಲಿದ್ದ ಗೃಹಬಳಕೆಯ ವಸ್ತುಗಳು ಸುಟ್ಟು ಭಸ್ಮ

ವಿಟ್ಲ: 20 ಫೆಬ್ರುವರಿ (ಫಿಕ್ರೋಖಬರ್ ಸುದ್ದಿ) ವಿಟ್ಲ ಪಡ್ನೂರು ಗ್ರಾಮದ ಕುಕ್ಕಿಲ ಎಂಬ ಪ್ರದೇಶದಲ್ಲಿ ಮನೆಯಲ್ಲಿ ಬಳಸಲಾದ ಫ್ಯಾನಿನ ಮೂಲಕ ಬೆಂಕಿ ಕಿಡಿ ಹಾಸಿಗೆಗೆ ತಗುಲಿ ಮನೆಯೊಳಗೆ ಸುತ್ತ ಬೆಂಕಿ ಆವರಿಸಿಕೊಂಡ ಪರಿಣಾಮ ಮನೆಯಲ್ಲಿದ್ದ ಇಬ್ಬರು ಗಂಭೀರವಾಗಿ ಗಾಯಗೊಂಡಿದ್ದು, ಮನೆಯ ಗೃಹಬಳಕೆಯ ಸಾಮಾಗ್ರಿಗಳು ಸುಟ್ಟು ಬೂದಿಯಾಗಿದೆ ಎನ್ನಲಾಗಿದೆ. ಬೆಳಗಿನ ಜಾವ ಸುಮಾರು ಐದು ಗಂಟೆಯ ವೇಳೆ ಕೋಣೆಯೊಂದರಲ್ಲಿ ಮಲಗಿರುವ ವೇಳೆ ಮೇಲ್ಛಾವಣಿಯಲ್ಲಿದ್ದ ಫ್ಯಾನಿನಿಂದ ಏಕಾಏಕಿ ಬೆಂಕಿಯ ಕಿಡಿ ಮಂಚದ ಮೇಲಿದ್ದ ಹಾಸಿಗೆ ಮೇಲೆ ಬಿದ್ದು ಬೆಂಕಿ ತಗುಲಿದ್ದು, ತಕ್ಷಣ ಎಚ್ಚರಗೊಂಡ ಇಬ್ಬರೂ ಮನೆಯಿಂದ ಹೊರ ಬಂದಿದ್ದಾರೆ ಎನ್ನಲಾಗಿದೆ. ಮನೆಯಲ್ಲಿದ್ದ ವಿದ್ಯುತ್ ವೈರಿಂಗ್ ಸುಡುತ್ತಿರುವುದನ್ನು ಕಂಡು ಗೀತಾ ಅವರು ಮೇನ್ ಸ್ವಿಚ್ ಆಫ್ ಮಾಡಲು ತೆರಳಿದ ವೇಳೆ ಶಾಕ್ ಹೊಡೆದು ಪಕ್ಕದಲ್ಲಿದ್ದ ಕಿಟಕಿಯ ಗಾಜು ಇವರ ಕೈಗೆ ತಗುಲಿ ಕೆಳಗೆ ಬಿದ್ದು, ಗಂಭೀರವಾಗಿ ಗಾಯಗೊಂಡಿದ್ದಾರೆ. ಮನೆಯಲ್ಲಿದ್ದ ಕುಕ್ಕಿಲದ ನಿವಾಸಿಗಳಾದ ಪಂಜಿಗದ್ದೆ ರಮೇಶ್ ಚಂದ್ರ ಅವರ ಪತ್ನಿ ಗೀತಾ ಮತ್ತು ಪುತ್ರ ಅಭಿಷೇಕ್ ಗಂಭೀರವಾಗಿ ಗಾಯಗೊಂಡವರು ಎಂದು ಹೇಳಲಾಗಿದೆ. ಸ್ಥಳಕ್ಕೆ ತಲುಪಿದ ಅಗ್ನಿ ಶಾಮಕದಳದವರು ಬೆಂಕಿ ಆರಿಸಿದ್ದಾರೆ.