ಪ್ರತಿದಿನ 10 ಭಾರತೀಯ ಕಾರ್ಮಿಕರ ಸಾವು

ನವದೆಹಲಿ: 06 ನವೆಂಬರ್ (ಫಿಕ್ರೋಖಬರ್ ಸುದ್ದಿ) ಕೊಲ್ಲಿ ರಾಷ್ಟ್ರಗಳಲ್ಲಿ ಪ್ರತಿದಿನ ಅಂದಾಜು 10 ಭಾರತೀಯ ಕಾರ್ಮಿಕರು ಸಾವಿಗೀಡಾಗುತ್ತಿದ್ದಾರೆ ಎಂದು ಆರ್‌ಟಿಐ ಮಾಹಿತಿ ಆಧರಿಸಿ ಕಾಮನ್‌ವೆಲ್ತ್‌ ಮಾನವ ಹಕ್ಕುಗಳ ಸಂಘಟನೆ ವರದಿ ಮಾಡಿದೆ.  2012ರಿಂದ 2017ರ ಅವಧಿಯಲ್ಲಿ ವಿಶ್ವದೆಲ್ಲೆಡೆಯಿಂದ ಭಾರತ ಗಳಿಸಿದ ಆದಾಯದಲ್ಲಿನ ಅರ್ಧಕ್ಕಿಂತ ಹೆಚ್ಚು ಪಾಲಿನಲ್ಲಿ ಕೊಲ್ಲಿ ರಾಷ್ಟ್ರಗಳ ಭಾರತೀಯ ಕಾರ್ಮಿಕರ ಕೊಡುಗೆ ಇದೆ. ಈ ಆದಾಯದ ಪ್ರತಿ ಲಕ್ಷ ಕೋಟಿಗೆ ಹೋಲಿಸಿದರೆ ಸರಾಸರಿ ಸಾವಿನ ಸಂಖ್ಯೆ 117 ಇದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. 

2012ರ ಜ.1ರಿಂದ 2018ರ ಅರ್ಧವರ್ಷದವರೆಗೆ ಬಹರೇನ್, ಒಮನ್‌, ಕತಾರ್, ಕುವೈತ್‌, ಸೌದಿ ಅರೇಬಿಯಾ ಹಾಗೂ ಅರಬ್‌ ಸಂಯುಕ್ತ ರಾಷ್ಟ್ರಗಳಲ್ಲಿ (ಯುಎಇ) ಸಾವಿಗೀಡಾಗಿರುವ ಭಾರತೀಯ ಕಾರ್ಮಿಕರ ಕುರಿತು ಮಾಹಿತಿ ನೀಡಬೇಕೆಂದು ಕಾಮನ್‌ವೆಲ್ತ್‌ ಮಾನವ ಹಕ್ಕುಗಳ ಸಂಘಟನೆಯ (ಸಿಎಚ್‌ಆರ್‌ಐ) ವೆಂಕಟೇಶ್ ನಾಯಕ್ ಎನ್ನುವವರು ವಿದೇಶಾಂಗ ವ್ಯವಹಾರಗಳ ಸಚಿವಾಲಯಕ್ಕೆ ಆರ್‌ಟಿಐ ಅರ್ಜಿ ಸಲ್ಲಿಸಿದ್ದರು. 

ಯುಎಇದಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಹೊರತುಪಡಿಸಿ ಉಳಿದ ಕಡೆಯಿಂದ ಮಾಹಿತಿ ದೊರಕಿದೆ. ಜತೆಗೆ ಲೋಕಸಭೆ ಹಾಗೂ ರಾಜ್ಯಸಭೆಯಲ್ಲಿ ನೀಡಲಾದ ಲಿಖಿತ ಮಾಹಿತಿಗಳನ್ನೂ ಸೇರಿಸಿಕೊಂಡು ವರದಿ ಸಿದ್ಧಮಾಡಲಾಗಿದೆ.

ಪ್ರ, ವಾ ವರದಿ