ಹೆಸರಿಗಷ್ಟೇ ವಿಐಪಿ ಕೊಠಡಿ, ಷರೀಫ್‌ಗಿಲ್ಲ ಸೌಲಭ್ಯಗಳು

ರಾವಲ್ಪಿಂಡಿ: 17 ಜುಲೈ (ಫಿಕ್ರೋಖಬರ್ ಸುದ್ದಿ) ಭ್ರಷ್ಟಾಚಾರ ಪ್ರಕರಣದಲ್ಲಿ ಜೈಲಿನಲ್ಲಿರುವ ಪಾಕ್‌ ಮಾಜಿ ಪ್ರಧಾನಿ ನವಾಜ್‌ ಷರೀಫ್‌ ತಮ್ಮ ವಕೀಲರ ತಂಡವನ್ನು ಭೇಟಿಯಾಗಿದ್ದು, ಬಿ ದರ್ಜೆ ಸೌಲಭ್ಯದ ತಮ್ಮ ಕೊಠಡಿಯಲ್ಲಿ ಮಂಚ, ಹವಾ ನಿಯಂತ್ರಕ ಇಲ್ಲ ಮತ್ತು ಅಶುದ್ಧ ಶೌಚಾಲಯದ ಕುರಿತು ದೂರಿದ್ದಾರೆ. 

ಪನಾಮಾ ಪೇಪರ್ಸ್‌ ಹಗರಣದಲ್ಲಿ ರಾವಲ್ಪಿಂಡಿಯ ಅಡಿಯಾಲಾ ಜೈಲಿನಲ್ಲಿರುವ ಷರೀಫ್‌ ಮತ್ತು ಮಗಳು ಮರಿಯಮ್‌ ಷರೀಫ್‌ ಅವರಿಗೆ, ಗಣ್ಯರಿಗೆ ನೀಡಲಾಗುವ, ಆದರೆ ಬಿ ಶ್ರೇಣಿ ಸೌಲಭ್ಯದ ಕೊಠಡಿಯನ್ನು ನೀಡಲಾಗಿದೆ. 
ಜೈಲಿನಲ್ಲಿ ತಮ್ಮ ವಕೀಲರ ತಂಡವನ್ನು ಶನಿವಾರ ಭೇಟಿಯಾದ ಷರೀಫ್‌, ತಮಗೆ ಕೇವಲ ಹಾಸಿಗೆ ನೀಡಲಾಗಿದೆ. ಕೊಠಡಿಯಲ್ಲಿ ಒಂದು ಫ್ಯಾನ್‌ ಇದೆ. ಶೌಚಾಲಯ ದುಸ್ಥಿಯಲ್ಲಿದೆ ಎಂದು ದೂರಿದ್ದಾರೆ. ಆದರೆ ಜೈಲಿನಲ್ಲಿ ತಮಗೆ ನೀಡಿರುವ ಸೌಲಭ್ಯ ಉತ್ತಮವಾಗಿದೆ ಎಂದು ಮರಿಯಮ್‌ ತಿಳಿಸಿದ್ದಾರೆ ಎಂದು ಪಾಕ್‌ ಮಾಧ್ಯಮಗಳು ವರದಿ ಮಾಡಿವೆ. ಲಂಡನ್‌ನಿಂದ ಲಾಹೋರ್‌ಗೆ ಆಗಮಿಸಿದ ಷರೀಫ್‌ ಮತ್ತು ಮರಿಯಮ್‌ ಅವರನ್ನು ಶುಕ್ರವಾರ ರಾತ್ರಿ ಪಾಕ್‌ ರಾಷ್ಟ್ರೀಯ ಹೊಣೆಗಾರಿಕೆ ಘಟಕದ ಅಧಿಕಾರಿಗಳು ಬಂಧಿಸಿ, ರಾವಲ್ಪಿಂಡಿಯ ಅಡಿಯಾಲಾ ಜೈಲಿನಲ್ಲಿರಿಸಿದ್ದಾರೆ. ಸಾಮಾನ್ಯ ಪ್ರಕ್ರಿಯೆಯಂತೆ, ಇಸ್ಲಾಮಾಬಾದ್‌ ಜಿಲ್ಲಾ ನ್ಯಾಯಾಧೀಶರು ಮತ್ತು ಹಿರಿಯ ಪೊಲೀಸ್‌ ಅಧಿಕಾರಿಗಳ ಸಮ್ಮುಖದಲ್ಲಿ ಬಂಧಿತ ಇಬ್ಬರ ವೈದ್ಯಕೀಯ ಪರೀಕ್ಷೆಯನ್ನು ನಡೆಸಲಾಗಿದೆ. ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ವೈದ್ಯಕೀಯ ಪರೀಕ್ಷೆಯಿಂದ ತಿಳಿದುಬಂದಿದೆ. ಇದೇ ವೇಳೆ ನಿರ್ಗಮನ ನಿಯಂತ್ರಣ ಪಟ್ಟಿ(ಇಸಿಎಲ್‌)ಯಲ್ಲಿ ಷರೀಫ್‌ ಮತ್ತು ಮರಿಯಮ್‌ ಅವರ ಹೆಸರನ್ನು ಸೇರಿಸುವ ಭಾಗವಾಗಿ ಹಂಗಾಮಿ ಸಚಿವಾಲಯದ ಉಪ ಸಮಿತಿಯು ಶನಿವಾರ ಸಭೆ ಸೇರಿತ್ತು. ದೇಶವನ್ನು ತೊರೆಯದಂತೆ ನಿರ್ಬಂಧಿಸಲು ಇಸಿಎಲ್‌ ಪಟ್ಟಿಯಲ್ಲಿ ಇಬ್ಬರ ಹೆಸರನ್ನು ಸೇರಿಸುವಂತೆ ಉಸ್ತುವಾರಿ ಗೃಹ ಸಚಿವ ಅಜಂ ಖಾನ್‌ ನೇತೃತ್ವದ ಸಮಿತಿಯು ಹಂಗಾಮಿ ಪಾಕ್‌ ಪ್ರಧಾನಿ ನಸಿರುಲ್‌ ಮುಲ್ಕ್‌ ಅವರಿಗೆ ಶಿಫಾರಸು ಮಾಡಿದೆ. 

ವಿ, ಕ ವರದಿ