نئی دہلی: وزیر اعظم نریندر مودی اوڈیشہ کے بالاسور میں جائے حادثہ پر پہنچ چکے ہیں۔ پی ایم پہلے بھونیشور ایئرپورٹ پہنچے، پھر ہیلی کاپٹر کے ذریعے بالاسور کے لیے روانہ ہوئے۔ یہاں کی صورتحال کا جائزہ لینے کے بعد، پی ایم مودی زخمیوں کی حالت معلوم کرنے کے لیے کٹک کے ایس سی بی ہسپتال پہنچے ہیں۔ اس سے پہلے پی ایم مودی نے نئی دہلی میں ایک اعلیٰ سطحی میٹنگ میں جمعہ کی شام ہونے والے ٹرین حادثے کے بعد صورتحال کا جائزہ لیا تھا۔

وزیر اعظم مودی کی طرف سے منعقدہ اس اعلیٰ سطحی میٹنگ میں مرکزی وزیر داخلہ امت شاہ، کابینہ سکریٹری، مرکزی داخلہ سکریٹری اور این ڈی آر ایف کے ڈی جی کے علاوہ ریلوے بورڈ کے رکن اور کئی دیگر اعلیٰ حکام بھی موجود تھے۔ میٹنگ میں وزیر اعظم نریندر مودی کو اس ٹرین حادثے سے متعلق حقائق اور اس کے بعد کے حالات سے آگاہ کیا گیا۔ یہاں ساؤتھ ایسٹرن ریلوے نے ہفتہ کو بتایا کہ بالاسور ٹرین حادثے میں مرنے والوں کی تعداد بڑھ کر 261 ہو گئی ہے، جب کہ تقریباً 900 لوگ زخمی ہوئے ہیں۔

ریلوے کے وزیر اشونی وشنو نے ہفتہ کی صبح جائے حادثہ کا دورہ کیا اور بتایا اس معاملے کی تفصیلی اعلیٰ سطحی انکوائری کی جائے گی اور کمشنر آف ریلوے سیفٹی کی طرف سے آزادانہ انکوائری کی جائے گی۔ جائے حادثہ پر میڈیا سے بات کرتے ہوئے وشنو نے کہا کہ ہمارا فوکس بچاؤ اور امدادی کارروائیوں پر ہے۔ ضلع انتظامیہ سے منظوری ملنے کے بعد اس روٹ پر ریل سروس کی بحالی شروع ہو جائے گی۔ تفصیلی اعلیٰ سطحی انکوائری کی جائے گی اور کمشنر آف ریلوے سیفٹی بھی آزادانہ انکوائری کریں گے۔

آپ کو بتا دیں کہ جمعہ کی شام کو پیش آنے والے اس حادثے میں ایک مال ٹرین اور دو مسافر ٹرینیں شامل تھیں۔ حادثے میں کورومنڈیل ایکسپریس اور ایس ایم وی ٹی ہاوڑہ سپر فاسٹ ایکسپریس کے 17 ڈبے پٹری سے اتر گئے۔ یہ گزشتہ 15 سالوں میں ملک میں ہونے والے سب سے سنگین ریل حادثات میں سے ایک ہے۔