نئی دہلی:27مارچ2023(فکروخبر/ذرائع) کانگریس لیڈر راہل گاندھی نے کہا ہے کہ حکومت عوام کا پیسہ اڈانی گروپ کی کمپنیوں میں کیوں لگا رہی ہے، اس کا ملک کو جواب چاہئے لیکن حکومت خاموش ہے۔ راہل گاندھی نے الزام لگایا کہ اڈانی گروپ کی کمپنیوں میں جو رقم غلط طریقے سے لگائی گئی ہے اس کے بارے میں سوالات پوچھے جارہے ہیں لیکن اس کی نہ جانچ کی جارہی ہے اور نہ ہی اس سلسلے میں کوئی جواب دیا جارہا ہے۔ انہوں نے ٹویٹ کیا 'ایل آئی سی کی پونجی اڈانی کو۔ ایس بی آئی کا پونجی اڈانی کو۔ ای پی ایف او کا سرمایہ بھی اڈانی کو۔ موڈانی کے انکشاف کے بعد بھی عوام کی ریٹائرمنٹ کی رقم اڈانی کی کمپنیوں میں کیوں لگائی جا رہی ہے؟ وزیراعظم جی ، نہ کوئی تحقیقات، نہ جواب ۔ اتنا خوف کیوں؟

دریں اثنا کانگریس صدر ملکارجن کھڑگے نے بھی سوال کیا کہ چند سالوں میں اڈانی کی دولت 12 لاکھ کروڑ روپے تک کیسے پہنچ گئی اور جب کانگریس لیڈر راہل گاندھی نے اس بارے میں سوال کیا تو ان کی آواز کو دبانے کی کوششیں کی جارہی ہیں۔ پرینکا گاندھی نے پارلیمنٹ میں راہل گاندھی کی رکنیت منسوخی پر مودی حکومت پر حملہ بولا۔ پرینکا نے کہا کہ جب راہل گاندھی نے پارلیمنٹ میں اڈانی کی لوٹ مار پر سوال اٹھایا تو ان کی آواز کو دبانے کی سازشیں کی گئیں۔ اب راہل کے یہ سوال پورے ملک میں گونجیں گے۔ واضح رہے کہ کانگریس کے رکن پارلیمنٹ اور پارٹی کے سابق صدر راہل گاندھی کو سورت کی ایک عدالت نے ہتک عزت کے ایک مقدمے میں دو سال کی سزا سنائے جانے کے بعد لوک سبھا سے نااہل قرار دے دیا ہے۔