کابل: 28/مارچ/2022(فکروخبر/ذرائع)افغان طالبان نے خواتین کے لیے تفریحی پارکوں میں جانے کے الگ دن مقرر کر دیے ہیں۔

تفصیلات کے مطابق طالبان نے افغانستان کی حکومت سنبھالنے کے بعد سے صنفی علیحدگی اور خواتین سے متعلق کئی سخت قوانین نافذ کیے ہیں۔

چند دن قبل طالبان انتظامیہ نے تفریحی پارکوں سے متعلق بھی ہدایات جاری کر دی ہیں، جس کے مطابق مردوں اور خواتین کے ایک ہی دن تفریحی پارکوں میں جانے پر پابندی ہوگی۔

افغان میڈیا کا کہنا ہے کہ افغانستان میں مرد اور عورتیں ایک ہی دن پارکوں میں نہیں جا سکیں گے، مردوں کو بدھ سے ہفتے تک تفریحی پارکوں میں جانے کی اجازت ہوگی، جب کہ خواتین ہفتے کے باقی دنوں میں یعنی اتوار، پیر اور منگل کو پارکس جا سکیں گی۔

واضح رہے کہ حال ہی میں کابل ایئر پورٹ پر بغیر محرم کے سفر کرنے والی درجنوں خواتین کو فلائٹ میں سوار ہونے سے روک دیا گیا تھا، طالبان نے بغیر محرم سفر کرنے پر پابندی عائد کی ہوئی ہے۔

یاد رہے کہ طالبان کے ترجمان ذبیح اللہ مجاہد نے ٹوئٹر پر اپنے پیغام میں کہا تھا کہ امارت اسلامیہ کے مجاہدین کو تفریحی پارکوں میں ہتھیاروں، فوجی وردیوں اور گاڑیوں کے ساتھ داخل ہونے کی اجازت نہیں ہے، نیز وہ تفریحی پارکوں کے تمام قواعد و ضوابط پر عمل کرنے کے پابند ہیں۔

ARY News Urdu