دوحہ: 19 مئی 2020(فکروخبر/ذرائع)قطری حکومت نے 19 سے 30 مئی تک تمام کاروباری سرگرمیاں بند کرنے کا اعلان کردیا، بندش کا اطلاق کھانے پینے اور دواؤں کی دکانوں پر نہیں ہوگا۔

مقامی خبر رساں ادارے کے مطابق قطر میں 19 سے 30 مئی تک تمام کاروباری سرگرمیاں معطل کرنے کا اعلان کردیا گیا تاکہ کرونا وائرس کا مزید پھیلاؤ روکا جاسکے۔

اس بندش کا اطلاق فارمیسیوں، کھانے پینے کی دکانوں اور کھانا پہنچانے والی سروسز پر نہیں ہوگا۔

خیال رہے کہ قطر نے کرونا وائرس کی عالمگیر وبا سے جنگ لڑنے کے لیے دنیا کی نہایت سخت ترین سزائیں متعارف کرا دی ہیں، عوامی مقامات میں فیس ماسک نہ پہننے والوں کا 3 سال جیل کی سزا دی جائے گی اور 45 ہزار پاؤنڈ جرمانہ کیا جائے گا۔

قطر میں فیس ماسک پہننے کے قانون کی خلاف ورزی کرنے والوں کو بھی 3 سال تک قید کی سزا اور 55 ہزار ڈالر تک جرمانے کا سامنا ہوگا۔

ڈرائیورز اگر اپنی گاڑیوں میں اکیلے ہوں گے تو وہ اس قانون سے مستثنیٰ ہیں لیکن پولیس اہلکار چیک پوائنٹس پر گاڑیوں کو روک کر نئے قانون کے عمل میں آنے سے قبل انہیں بھی متنبہ کر رہے ہیں۔

قطر میں اب تک کرونا وائرس کے 33 ہزار 969 کیسز سامنے آچکے ہیں جبکہ وائرس سے صرف 15 اموات ہوئی ہیں۔