کابل، نیٹو کے فضائی حملے کی زد میں آکر 18 افغان پولیس اہلکار ہلاک

کابل:18مئی2019(فکروخبر/ذرائع) افغانستان میں نیٹو کی جانب سے کیے جانے والے فضائی حملے کی زد میں آکر 18 افغان پولیس اہلکار ہلاک ہوگئے۔غیرملکی خبررساں ادارے کے مطابق افغانستان کے جنوبی صوبے ہلمند کے دارالحکومت میں طالبان سے جھڑپوں کے دوران نیٹو کے فضائی حملے میں غلطی سے 18 افغان پولیس اہلکار ہلاک ہوگئے۔

ہلمند کی صوبائی کونسل کے صدر عطا اللہ افغان نے کہا کہ نیٹو کے حملے میں 14 پولیس اہلکار زخمی بھی ہوئے جنہیں طبی امداد کے لیے اسپتال منتقل کردیا گیا ہے۔رپورٹ کے مطابق نیٹو سے مقامی انتظامیہ نے جاری طالبان جھڑپ میں مدد طلب کی تھی، نیٹو کا ہدف طالبان جنگجو تھے لیکن نشانے پر غلطی سے افغان پولیس اہلکار آگئے۔

صوبائی حکومت کے ترجمان کے مطابق فضائی حملہ ہلمند، قندھار ہائی وے کے علاقے نہر سراج میں نیٹو کے ریزولیٹ سپورٹ مشن فورس کی جانب سے کیا گیا تھا۔ہلمند کے گورنر محمد یاسین نے کہا کہ فضائی حملے کی تحقیقات جاری ہیں، دوسری جانب طالبان کے بیان میں دعویٰ کیا گیا ہے کہ حملہ امریکی فورسز کی جانب سے کیا گیا تھا۔

واضح رہے کہ امریکی فوج نے اس حوالے سے کسی قسم کا بیان جاری نہیں کیا گیا ہے۔یاد رہے کہ طالبان کے حملوں میں اضافے کے بعد سے ایک ہفتے میں 90 اہلکار ہلاک ہوچکے ہیں جبکہ ہلاک ہونے والوں میں درجنوں عام شہری بھی شامل ہیں۔

افغانستان کے اس بڑے صوبے کے زیادہ تر حصے پر طالبان کا کنٹرول ہے جس کی وجہ سے امریکی قیادت کی بین الاقوامی فوج مقامی فورسز کی مدد کے لیے وہاں عموماً فضائی حملے کرتی رہتی ہے۔