English   /   Kannada   /   Nawayathi

ہریانہ: کھٹر حکومت میں غنڈہ راج، بس کنڈکٹر نے خاتون کو جوتے سے پیٹا، ویڈیو وائرل

share with us

انبالہ:13مئی 2019(فکروخبر/ذرائع)ہریانہ میں منوہر لال کھٹر کی قیادت والی بی جے پی حکومت کے دور میں خواتین غیر محفوظ ہیں۔ تازہ معاملہ انبالہ کا ہے جہاں چھاونی کے بس اڈے پر ایک بس کنڈکٹر نے خاتون کی جوتوں سے پٹائی کر دی۔ اتنا ہی نہیں کنڈکٹر نے بس کے ہیلپر سے اس واقعہ کی ویڈیو بھی بنوائی اور اسے سوشل میڈیا پر وائرل کر دیا۔

اطلاعات کے مطابق کنڈکٹر کا کہنا تھا کہ خاتون نے تقریباً 8 مہینے پہلے اس پر چھیڑ خانی کا جھوٹا الزام لگا کر پٹائی کی تھی۔ وہیں خاتون نے ملزم بس کنڈکٹر کے خلاف شکایت درج کرائی ہے۔ بتایا جا رہا ہے کہ دی بن کارپوریٹیو سوسائٹی کا کنڈکٹر نریندر کمار جگدھاری سے اپنی بس کو لے کر انبالہ شہر آ رہا تھا۔

چھاونی بس اسٹینڈ پر جیسے ہی بس پہنچی، کنڈکٹر نے خاتون کے بال پکڑ کر نیچے اتار لیا۔ اس کے بعد اس نے خاتون کو جوتوں سے پیٹنا شروع کر دیا۔ جس وقت کنڈکٹر خاتون کو زد و کوب کر رہا تھا اسی دوران بس کا ہیلپر اس واقعہ کی ویڈیو بنا رہا تھا۔

اطلاعات کے مطابق اس واقعہ میں خاتون کو کافی چوٹیں آئی ہیں۔ انبالہ کے پڑاؤ تھانہ کے ایس ایچ او منیش نے بتایا کہ اطلاع موصول ہونے کے بعد پولس نے متاثرہ کی شکایت پر معاملہ درج کر لیا ہے۔ اس کے بعد پڑاؤ پولس متاثرہ خاتون کو میڈیکل جانچ کے لئے سول اسپتال لے کر گئی۔

واضح رہے کہ تازہ معاملہ کے تار تقریباً 8 مہینے پہلے پیش آنے والے ایک واقعہ سے جڑے ہیں۔ 19 ستمبر 2018 کو خاتون نے چھیڑ خانی کا الزام عائد کر کے کنڈکٹر کو پیٹا تھا۔ خاتون کے علاوہ بھیڑ نے بھی اس کی پٹائی کی تھی۔ لوگ پٹائی کی ویڈیو بناتے ہوئے اسے تھانہ تک لے کر گئے۔ معاملہ تھانہ میں پہنچا تو خاتون نے کہا کہ اسے غلط فہمی ہو گئی ہے اور چھیڑ خانی کسی دوسرے شخص نے کی تھی۔ مانا جا رہا ہے کہ اسی واقعہ کا انتقام لینے کے لئے نریندر نے خاتون کے ساتھ مار پیٹ کی ہے اور اس کی ویڈیو بنائی ہے۔

Prayer Timings

Fajr فجر
Dhuhr الظهر
Asr عصر
Maghrib مغرب
Isha عشا