عراق کی سرحد پر جھڑپ، 4ترک فوجی اور 20کرد جنگجو ہلاک

عراق:21اپریل2019(فکروخبر/ذرائع)ترک وزارت دفاع اورمسلح افواج کی طرف سے جاری ایک بیان میں کہا گیاہے کہ  عراق کی سرحد پر فوج اور کرد باغی گروپ کے درمیان ہونے والی جھڑپ میں چار فوجی اور 20جنگجو ہلاک ہوئے ہیں۔غیر ملکی خبر رساں اداروں کے مطابق جنوب مشرقی ترکی کے عراق سے متصل پہاڑی علاقے سکورجا میں کرد ورکرز پارٹی کے جنگجوئوں نے فوج کے ایک کیمپ پر حملہ کیا۔ فوج نے دہشت گردوں کے خلاف جوابی کارروائی کی جس کے نتیجے میں 20جنگجو ہلاک اور متعدد زخمی ہوگئے جب کہ لڑائی میں چار ترک فوجی بھی مارے گئے۔ دہشت گردوں کے حملے کے بعد فوج نے فضائی کارروائی کرکے عراق کی سرحد کے قریب کرد جنگجوئوںکے کئی ٹھکانے تباہ کردئیے۔وزارت دفاع کے مطابق کرد جنگجوئوں کے حملے میں 6 فوجی زخمی بھی ہوئے ہیں جنہیں علاج کے لیے اسپتال منتقل کردیا گیا ہے۔