English   /   Kannada   /   Nawayathi

جموں گرینیڈ دھماکے میں گرفتار کشمیری طالب علم کا کوئی مجرمانہ ریکارڑ نہیں: ذرائع

share with us

جموں:10مارچ2019(فکروخبر/ذرائع) ذرائع کے مطابق جموں گرینیڈ دھماکے کے سلسلے میں گرفتار کشمیری طالب علم کا نہ کوئی مجرمانہ ریکارڑ ہے اور نہ وہ کوئی سرگرم جنگجو ہے۔

ذرائع نے یو این آئی کو بتایا کہ جموں گرینیڈ دھماکے کے سلسلے میں گرفتار کشمیری طالب علم کا کوئی مجرمانہ ریکارڑ نہیں ہے اور نہ ہی وہ کسی ملی ٹنٹ تنظیم کے ساتھ وابستہ ہے بلکہ اس کو ایسا کرنے کے لئے پیسوں کا لالچ دیا گیا تھا۔ انہوں نے بتایا کہ گرفتار طالب علم کولگام کا رہنے والا ہے اور اس کا تعلق ایک غریب خاندان سے ہے۔

ذرائع نے تفتیش کاروں کے حوالے سے بتایا کہ یاسر جاوید بٹ نامی اس طالب علم کو حزب المجاہدین کے ضلع کمانڈر کولگام نے یہ کام کرنے کے لئے دس ہزار روپے دیئے تھے۔ ذرائع کا یہ بھی کہنا ہے کہ یاسر نے پولس کو چکمہ دینے کے لئے گرینیڈ کو بریانی کے ڈبے میں پیک کرکے جموں پہنچایا۔

انہوں نے بتایا کہ ایک مسافر بردار ٹیکسی میں کولگام سے جموں سفر کرنے والے قریب 11 مسافروں کو پوچھ تاچھ کے لئے حراست میں لیا گیا جن میں سے دس کو بعد ازاں رہا کیا گیا جبکہ شوکت احمد نامی ٹیکسی ڈرائیور ابھی زیر حراست میں ہے جس کے بارے میں شک کیا جارہا ہے کہ وہ دوسرا مرتکب ہوسکتا ہے۔

ادھر گرفتار شدہ طالب علم کے اہل خانہ کا کہنا ہے کہ یاسر نویں جماعت کا طالب علم ہے اس کی عمر صرف چودہ سال ہے وہ گھر سے کبھی باہر نہیں نکلا ہے نہ ہی کسی کے گھر جایا کرتا تھا جس کے باعث اس کو یہاں کوئی اچھی طرح جانتا بھی نہیں ہے۔ ان کا کہنا ہے کہ یاسر پر لگائے گئے الزامات بے بنیاد ہیں۔ انہوں نے ریاستی گورنر سے اس معصوم بچے پر رحم کرنے کی اپیل کرتے ہوئے کہا کہ اس کو براہ مہربانی رہا کریں۔

جموں و کشمیر گورنر کے مشیرکے وجے کمار نے گذشتہ روز یاسر کے بارے میں پوچھے جانے پر کہا 'اُس کو نیزے کی نوک کے طور پر استعمال کیا گیا ہے۔ ایسے عناصر موجود ہیں جنہوں نے اسے یہ کام انجام دینے کے لئے تیار کیا تھا۔ وہ ایک عام نوجوان ہے۔ اپنے مقصد کو پورا کرنے کے لئے معصوم ذہنوں کا استعمال کرنا ایک ظالمانہ حربہ ہے۔ وہ اپنے مقصد میں کبھی کامیاب نہیں ہوں گے کیونکہ ہم سب متحد ہیں'۔

قابل ذکر ہے کہ جموں کے بس اڈے میں جمعرات کو ہوئے گرینیڈ دھماکے میں ایک غیر ریاستی نوجوان سمیت 2 افراد ہلاک جبکہ دیگر 31 افراد زخمی ہوئے۔ سبھی زخمیوں کو گورنمنٹ میڈیکل کالج و جموں کے اسپتال میں داخل کرایا گیا تھا۔ گرینیڈ دھماکے کی وجہ سے بس اڈے میں کھڑی کچھ گاڑیوں کو بھی نقصان پہنچا تھا۔

 

Prayer Timings

Fajr فجر
Dhuhr الظهر
Asr عصر
Maghrib مغرب
Isha عشا