ایران سے رہا ہونے والے افراد کا پہلا وفد شہر بھٹکل پہنچا 

تینگن گنڈی کی مرکزی جماعت اور مجلس اصلاح وتنظیم کی جانب سے کیا گیا پرتپاک استقبال 

بھٹکل 16؍ جنوری 2019(فکروخبر نیوز) کچھ ہی روز قبل ہی ایران سے رہا ہونے والے افرادکا پہلا وفد آج بعد نمازِ عشاء بھٹکل پہنچا جس کا مرکزی جماعت المسلمین تینگن گنڈی اور مجلس اصلاح وتنظیم بھٹکل کی جانب سے پرتپاک استقبال کرتے ہوئے انہیں مٹھائی کھلائی گئی۔ جیسے ہی آج شام ان کی آمد کی خبر پہنچی تو مذکورہ جماعت اور تنظیم کے ذمہ داروں نے ان کا خیر مقدم کرنے کا فیصلہ کیا ، ذمہ داروں کو ان کا خیر مقدم کرنے کی خوشی کا اندازہ صرف اس بات سے لگایا جاسکتا ہے وقت سے پہلے وہ نور مسجد کے قریب پہنچ گئے او ران کا انتظار کرنے لگے۔ جیسے جیسے وہ بھٹکل سے قریب آرہے تھے ان کی اپنی خوشیوں کے ساتھ وہاں استقبال میں کھڑے لوگوں کی خوشیوں میں اضافہ ہورہا تھا۔ ان کی گاڑی رکتے ہی لوگوں نے انہیں گلے لگایا، ان کے گلے میں پھولوں کے ہار پہنائے او ربخیروعافیت بھٹکل پہنچنے پر اللہ کا شکربجالایا۔ فکروخبر کے مطابق بھٹکل پہنچنے والے افراد کے چہروں سے خوشیوں کے آثار صاف طور پر نظر آرہے تھے اوربرملا ذمہ داروں کا شکریہ ادا کررہے تھے۔ اس موقع پر انہوں نے ان تمام احباب اور ذمہ داروں کا شکریہ ادا کیا جنہوں نے ان کی رہائی کے لیے کوششیں کی تھیں۔