غزہ پر اسرائیلی پابندیاں، 8 فلسطینی مریض زندگی کی بازی ہار گئے

اسرائیل سوچے سمجھے منصوبے کے تحت غزہ میں بیماروں کی زندگیوں سے کھیل رہا ہے،انسانی حقوق تنظیم 

غزہ ۔11دسمبر(یواین این )فلسطین کے علاقے غزہ کی پٹی پر اسرائیل کی طرف سے مسلط کی گئی پابندیوں کے نتیجے میں شہری علاج کی سہولت سے محرومی کے باعث زندگی کی بازی ہار رہے ہیں۔ ایک رپورٹ کے مطابق اسرائیلی پابندیوں کے باعث اب تک 8 فلسطینی مریض زندگی کی بازی ہار چکے ہیں، ان میں سے تین فلسطینی مریض رواں سال کے دوران فوت ہوئے۔مرکز برائے انسانی حقوق کی طرف سے جاری رپورٹ کے مطابق غزہ کی پٹی کے مریضوں کے بیرون ملک علاج اسرائیلی پابندیاں بدستور برقرار ہیں جس کے نتیجے میں غزہ میں لا علاج کئے گئے فلسطینی زندگی کی بازی ہار رہے ہیں۔ رواں سال بھی ایسے ہی تین مریض دم توڑ گئے۔ ڈاکٹروں نے انہیں غزہ کی پٹی سے باہر لے جانے کی کوشش کی تھی مگر صہیونی حکام کی طرف سے انہیں غزہ سے غرب اردن لے جانے کی اجازت نہیں دی گئی۔انسانی حقوق کی تنظیم نے صہیونی ریاست کی انتقامی پالیسی کی شدت کیساتھ مذمت کرتے ہوئے کہا کہ اسرائیل ایک سوچے سمجھے منصوبے کے تحت غزہ میں بیماروں کی زندگیوں سے کھیل رہا ہے۔