ٹرمپ،خاشقجی کے قتل کی تفتیش پر آنکھیں پھیر لیں گے، ترک وزیر خارجہ

یورپ اورٹرمپ کے بیانات ملتے جلتے ہیں مگر ہم قتل پر روشنی ڈالنے کے لیے لازی کچھ کریں گے،گفتگو

انقرہ :24؍نومبر2018(فکروخبر/ذرائع)ترک وزیر خارجہ میولت کوواسگلونے کہاہے کہ جمال خاشقجی کے قتل سے متعلق امریکی صدر ڈونلڈ ٹرمپ کے حالیہ بیانات سے ظاہر ہے کہ وہ اس معاملے پر تفتیش کے نتائج پر آنکھیں پھیر لیں گے۔غیرملکی خبررساں ادارے کے مطابق ترک وزیر خارجہ نے امریکی صدر کے حالیہ بیان پر تنقید کرتے ہوئے کہا کہ ڈونلڈ ٹرمپ نے یہ کہنے کے بجائے کہ ہوسکتا ہے کہ ولی عہد محمد بن سلمان سعودی صحافی جمال خاشقجی کے قتل سے آگاہ ہوں، سعودی عرب کا ثابت قدم ساتھی بننے کا عندیہ دیا۔میولت کوواسگلو نے ڈونلڈ ٹرمپ کی جانب سے انصاف پر تجارتی تعلقات کو ترجیح دینے پر تنقید کرتے ہوئے کہا کہ انسانی زندگی کو فوقیت دی جانی چاہیے۔انہوں نے امریکی نشریاتی ادارے کو بتایا کہ ٹرمپ کے بیان کا مطلب ہے کہ ’کچھ بھی ہوجائے، میں آنکھیں پھیر لوں گا‘، یہ صحیح طریقہ نہیں ہے اور ہر چیز پیسہ نہیں ہے۔ترک وزیر خارجہ نے جمال خاشقجی کے قتل سے متعلق یورپی شراکت داروں کے حالیہ اقدامات پر بھی تبصرہ کیا۔میولت کوواسگلو کا کہنا تھا کہ یورپ کا کہنا ہے کہ سعودی عرب سے تعلقات خراب نہیں کرنا چاہتے، ہم یورپ سے تعلقات خراب نہیں کرنا چاہتے۔ان کا مزید کہنا تھا کہ ترکی جمال خاشقجی کے قتل پر روشنی ڈالنے کے لیے لازمی کچھ کرے گا۔